DILI, 14 Agostu 2025 (TATOLI)—Prezidente Konsellu Administrasaun Aeroportu no Navegasaun Aérea Timor- Leste, Empreza Públiku (ANATL E.P), Romaldo da Silva, hateten ANATL iha planu atu kontrata Empreza Devita Group atu aumenta tan Taxi Argo hodi halo operasaun iha aeroportu internasionál Prezidente Nicolau Lobato, Komoro, Dili.
Notísia Relevante: ACTTL klarifika tarifa taxi ne’ebé virál iha mídia sosiál
Nia hatutan, ANATL sei implementa tan regra balun no koordena ho parséria sira inklui taxista sira, bainhira reabilitasaun ba terminál ezistente aeroportu ramata.
“Ha’u sei tau kontratu ho Taxi Argo hodi kria fasilidade ne’e di’ak atu nune’e pasajeiru ne’ebé tama sai aeroportu bele sente seguru no konfortavél,” rezidente Konsellu Administrasaun Aeroportu no Navegasaun Aérea Timor- Leste (ANATL E.P) ne’e informa ba jornalista iha nia kna’ar fatin, ohin.
Ho nune’e, nia dehan, bele kria kompetisaun ba hotu-hotu katak kria kondisaun ne’e hodi fó kompeténsia ba ema hotu no depende ba pasajeiru sira hodi hili taxi ne’ebé bele tula sira ba fatin distinadu
“Ha’u mós iha planu sei tau kaereta balun para bainhira ema mai husi li’ur ho família ruma bele fasilita sira halo viajen iha Timor,” nia esplika.
Tamba ne’e, ANATL sei halo koordenasaun ho kompañia Taxi Argo, tanba Taxi Argo ne’e kompañia Divita nian, entaun sei implementa ho kontratu atu labele hamosu dezintendimentu tanba se laiha kontratu ida-idak halo tuir ninia hakarak de’it.
Maibé, tuir nia, ANATL halo hela reabilitasaun ba terminál ezistente, hein katak fulan ida ka rua prontu ona, entaun tempu badak sei loke tan estasionamentu ida tan ba karreta no motorizada hodi asegura espasu iha aeroportu internasionál Nicolau Lobato, Komoro, Dili.
“Ami mós sei tau funsionáriu ida ka rua hodi halo kontrola ka asegura transporte sira-ne’ebé para iha ne’ebá,” nia dehan.
Notísia Relevante: Devita Group Apoia ANATL Rezolve Problema Jeradór Iha Aeroportu Dili
Jornalista : Alexandra da Costa
Editór : Cancio Ximenes
