ACTTL klarifika tarifa taxi ne’ebé virál iha mídia sosiál
DILI, 08 Agostu 2025 (TATOLI)—Prezidente Asosiasaun Kooperativa Taxi Timor-Leste (ACTTL-sigla portugeza), Dinis Guterres Soares halo klarifikasaun kona-ba tarifa taxi aeroportu nian ne’ebé virál iha mídia sosiál.
Dinis esplika vídeo ne’ebe virál iha mídia sosiál katak tarifa taxi ho montante $20 to’o $70 husi aeroportu ba Timor Plaza aplikadu ba ema estranjeiru ida-ne’ebé konsege virál ne’e liuhusi akordu.
“Antes lori malae ne’e ba iha Timor Plaza, sira na’in-rua bá almosu iha fatin balun antes ba fatin destinadu (Timor Plaza). Tanba ne’e mak malae ne’e selu osan $20. Antes ne’e mós motorista ho sidadaun estranjeiru ne’e halo ona negosiasaun katak la’ós tula lori diretamente ba fatin destinadu maibé sei ba fatin seluk mós, entaun hotu tiha sidadaun estranjeira ne’e mós fó tan osan ba motorista ne’e hamutuk $70. Nia la ko’alia buat ida. Nia fó de’it ba taxista ne’e hodi dehan ne’e O nia sorte ohin loron nian mak ha’u fó ba O,” Prezidente ne’e informa ba jornalista sira iha Bidau-Lesidere, Sesta ne’e.
Tanba ne’e, Dinis husu ba públiku bainhira atu públika informasaun ruma tenke hatene ninia kronolojia loloos, labele espalla informasaun no dadus ne’ebé la klaru atu públiku konsume hodi sai fali polémika.
“Ha’u konsidera iha interese privadu no la gosta ami taxista aeroportu sira mak halo hanesan ne’e,” nia dehan.
Nia haktuir katak iha tinan 2003 to’o 2023 ne’e tarifa taxi hahu husi montante $5 to’o $10, ne’e tanba seidauk selu taxa ba Estadu, maibé iha tinan 2024 aeroportu aplika prosedimentu asesu nian, nune’e mak presu tarifa aumenta ba $15 to’o $20.
“Ida-ne’e mós la’ós ami tula pasajeiru sira loron-loron, maibé depende ba aviaun Qantas (Austrália) no aviaun Malázia nian bainhira tun foin tula no depende mós ba ema hakarak ami mak tula sira,” Dinis informa.
Nia esklarese kona-ba tarifa presu iha área Dili laran baibain ho presu $15 maibé bainhira bá fali Kristu Rei, Bekora no Lahane nia montante $20, tanba kondisaun dook uitoan.
“Ami mós sempre halo inspesaun ba kondisaun taxi nian iha Diresaun Nasionál Transporte Terrestre (DNTT). Karik ladi’ak labele halo operasaun. Ami sempre halo inspesaun ba kondisaun taxi nian iha kada tinan no ami iha planu atu aumenta tan taxi foun bainhira kondisaun aeroportu di’ak ona,” nia afirma.
Daudaun ne’e, ACTTL rejista taxi kooperativa hamutuk 17 no rendimentu ne’ebé sira hetan loron ida bele $15, se lae $20. Enkuantu, taxa ne’ebé ACTTL baibain selu ba ANATL kada fulan neen rihun $6 no tinan ida rihun $12.
Jornalista: Alexandra da Costa
Editór: Xisto Freitas da Piedade
