DILI, 14 Agostu (TATOLI) – Parlamentu Nasionál (PN) aprova ona pedidu dezlokasaun Prezidente Repúblika (PR), José Ramos-Horta, bá Japaun, entre loron 21 no 29 Agostu ne’e.
Xefe Estadu hato’o pedidu dezlokasaun, tanba hetan konvite husi Primeiru-Ministru japonés, Ishiba Shigeru, hodi halo vizita traballu iha nasaun ne’e.
“Rezultadu votasaun a favór sia, kontra 0 no abstensaun 0, nune’e Parlamentu fó ona autorizasaun”, Prezidente Interina Parlamentu Nasionál no atuál Segundu Vise-Parlamentu, Maria Teresinha Viegas, fó sai iha reuniaun plenária estraordinária Komisaun Permanente nian, ohin.
Tuir ajenda, I,ha loron 22 Agostu Ramos-Horta sei halo enkontru ho membru Parlamentu Japaun. Sei halo mós palestra públika iha Universidade Tókiu ho tema “Leadership Beyond Borders Trough Transforming Asia-Pacific Relations”, iha ámbitu insiativa HPAIR Asia Conference 2025-Reinventing Vitality: Momentum and Memory.
Xefe Estadu aproveita oportunidade ne’e hodi vizita mós bá Fukuyama iha loron 27 Agostu hodi haree estaleiru navál empreza Tsuneishi Shipbuilding Companhy, no iha 28 Agostu partisipa iha selebrasaun Loron Nasionál Timor-Leste iha espasu Expo Osaka 2025.
Bibán ne’e, Prezidente Repúblika mós relata ba Parlamentu Nasionál nia viajen privada bá Austrália entre loron 11 no 14 Agostu ne’e.
Notísia relevante: Prezidente Repúblika partisipa Simeira AER ba da-12 iha Melbourne
Jornalista: Nelson de Sousa
Editora: Maria Auxiliadora
