DILI, 15 Agostu 2025 (TATOLI) – Autoridade Munisipál Lautein husu adisionál millaun $3,4 iha reuniaun Komité Revizaun Orsamentu (KRO) 2026, atu apoia preparasaun ba simu podér lokál husi Governu sentrál.
Prezidente Autoridade Munisípiu Lautein, Mélio de Jesus, hateten sira prepara ona planu no programa, maibé tetu orsamentu iha tinan ne’e seidauk sufisiente atu kobre nesesidade sira.
Nune’e pedidu adisionál ne’e inklui harii Asembleia Munisipál no edifísiu ba Prezidente Kámara Munisípiu, atu prienxe rekizitu mapa estrutura pesoál.
“Lautein preparadu simu podér lokál bainhira Governu sentrál fó. Daudaun halo hela preparasaun no tinan oin kontinua foku ba prepara kondisaun minima hodi haree aspetu rekursu umanu, materiál no finanseiru”, nia hateten iha edifísiu Ministériu Finansa, Aitarak-Laran.
Nia dehan tetu ne’ebé simu husi Ministériu Finansa hamutuk millaun $6,4 hodi aloka ba saláriu no vensimentu, bens no serbisu no transferénsia públika.
Prioridade munisípiu Lautein nian ba tinan 2026 mak atu implementa programa 13 ho atividade hamutuk 32, ho foku ba setór agrikultura, peska, turizmu. Área sira ne’e iha pontensialidade atu hasa’e rendimentu povu nian iha baze no ba iha kapitál sosiál, liuliu haree infraestrutura bázika hanesan eskola, fatin refetóriu ba merenda eskolár ba estudante no seluk tan.
Haree ba tetu orsamentu ne’ebé iha la kobre nesesidade ne’ebé iha, nune’e husu adisionál iha kapitál dezenvolvimentu hodi bele prepara kondisaun mínima sira iha parte infraestrutura ho seluk tan atu simu podér lokál.
Iha Orsamentu Jerál Estadu 2025, Governu aloka millaun $8,2 ba munisípiu Lautein no daudaun nia ezekusaun atinje ona 58%.
Jornalista: Nelson de Sousa
Editora: Maria Auxiliadora
