DILI, 20 Agostu 2025 (TATOLI)—Prezidente Repúblik, José Ramos-Horta, hateten diálogu mak dalan úniku atu prevene konflitu no kontra violénsia.
“Tenke halo diálogu ne’ebé parte seluk rona no respeita, tanba diálogu mak dalan úniku atu prevene konflitu sira, harii ponte sira entendimentu nian ne’ebé seguru no antidotu ida kontra violénsia,” Prezidente Repúblika, José Ramos-Horta, hateten iha diskursu ba selebrasaun aniversáriu loron FALINTIL ba da-50, iha Tasi-Tolu, ohin.
Ho nune’e, nia husu ba timoroan sira tenke aprende ba lisaun husi kapitulu nakukun durante funu iha tinan 24 nia laran iha istória resisténsia durante luta ba ukun rasik an, tenke evita retórika politika, ideolojia sira-ne’ebé kopia ladún di’ak husi realidade sira seluk no evita diskursu sira-ne’ebé halo manas emosaun no bele sunu ahi.
Nia dehan, iha loron 20 Agostu, tenke hanoin nu’udar loron neʼebé líder politiku sira la konsege halo diálogu, loron reflesaun ida atu istória labele repete tan.
Iha selebrasaun aniversáriu loron FALINTIL ne’e, konvida timoroan sira atu hanoin hikas halo funu iha konfrontu dahuluk no retirada iha Balibó, Maliana, Atabae no hatene defende ho eroizmu ita-nia sidade doben Díli, neʼebé viola iha loron fatidiku ne’ebá, loron 7 fulan-Dezembru 1975.
Tanba ne’e, nia husu ba timoroan sira atu fó omenajen ho agradesementu kle’an ba erói no tenke fó onra ba mártir pátria sira nian.
“Ha’u sauda veteranu sira, feto rezisténsia armada no klandestina nian, funu-na’in sira, foinsa’e sira RENETIL nian, membru rede klandestina nian, bispu sira no padre no madre sira-ne’ebé fó lian ba justisa no família sira hotu ne’ebé ho korajen sustenta esperansa nasionál. Ita-nia memória koletiva iha ligasaun ho naran no hahalok sira-ne’ebé reziste to’o eroi no martir sira-nia iis ikus,” Ramos-Horta hateten.
Jornalista : Alexandra da Costa
Editór : Cancio Ximenes
