DILI, 22 Agostu 2025 (TATOLI)—Zebra Klube Futeból (Zebra FC-sigla ingleza) konsidera jogu Jornada Daneen nu’udár finál nune’e garante gaña pontu tolu bainhira kontra Lica-Lica Lemorai FC iha jogu Segunda Divizaun Liga Futeból Timor-Leste (LFTL-sigla portugeza).
Treinadór Zebra FC, Rogério Moc esplika ekipa Zebra preparada atu joga iha Jornada daneen (ikus) kontra Lica-Lica Lemorai ne’ebé sei realiza iha Estádiu Gleno, Munisípiu Ermera, Sábadu (23 agustu).
“Ami konsidera hanesan jogu finál ba ami, tanba ne’e garante sei gaña pontu tolu kontra Lica-Lica Lemorai, ” Treinadór Zebra FC informa ba TATOLI liuhosi telefónema, Sesta ne’e.
Moc konsidera jogu kontra Lica-Lica Lemorai sai determinasaun ba destinu Zebra FC tanba bainhira derrota sei eliminada husi Segundu Divizaun LFTL tanba hetan de’it pontu lima no iha pozisaun dalimak iha tabela klasifikasaun.
Notísia relevante: Zebra FC husu LFTL aselera aloka orsamentu ba akomodasaun
Nia subliña ekipa téknika hala’o ona preparasaun ho másima hanesan treinu no maioria jogadór iha kondisaun di’ak hodi kombate hasoru Lica-Lica Lemorai. “Ami garante sei manán,” Moc otimista.
Tuir tabele klasifikasaun mezmu Lica-Lica Lemorai iha pozisaun daneen (zona mean) no rekolla pontu tolu maibé ekipa husi Munisípiu Vikeke ne’e sei iha oportunidade atu hakat liu Zebra FC tanba falta jogu rua, enkuantu Zebra hela jogu ida.
Entretantu, kompetisaun Jornada Ikus Segunda Divizaun interesante ba públiku tanba klube haat hanesan Zebra FC, Lica-Lica Lemorai, Kablaki no Nagardjo FC seidauk serteja atu mantein pozisaun iha Segunda Divizaun.
Bazeia ba tabela klasifikasaun provizória, Nagardjo FC okupa iha pozisaun 4 ho totál pontu 8 sei falta jogu rua, Zebra FC pontu 5 no sei falta jogu ida, Lica-Lica Lemorai zona mean ho pontu 3 no sei falta jogu rua, enkuantu Kablaki FC pontu 0 nune’e tenke manán jogu rua ikus kuandu hakarak mantein iha Segunda Divizaun.
Jornalista: Natalino Belo
Editór: Xisto Freitas da Piedade
