DILI, 22 Agostu 2024 (TATOLI)-Prezidénsia Repúblika propoin adisionál millaun $4.7 ba Komité Revizaun Orsamentu liuhusi enkontru ne’ebé hala’o iha Ministériu Finansa, sesta-ne’e.
Xefe Kaza Sívil Prezidénsia Repúblika, Jesuína Maria Ferreira Gomes, konsidera tetu Orsamentu Jerál Estadu 2026 ne’ebé Prezidénsia Repúblika simu mak $8.125,030 hodi aloka ba saláriu no vensimentu, $3.822,664, bens no serbisu $3.301,366, transferénsia públika $1,001,000.
Adisionál ne’ebé husu, nia dehan aloka ba saláriu no vensimentu millaun $1,2, bens no serbisu millaun $3, kapitál menór $320.000, transferénsia públika $54.000. Nune’e bele assegura funsionamentu ba programa, sub-programa no atividade sira iha Prezidénsia Repúblika.
Entretantu, Prezidénsia Repúblika iha OJE 2025 hetan alokasaun $10, 844,151 to’o fulan Jullu tinan ne’e ezekuta ona pursentu 62.
Rezultadu ezekusaun ne’e kompostu hosi saláriu no vensimentu pursentu 52, bens no serbisu 63%, kapitál menór ho transferénsia públika 82%, kapitál dezenvolvimentu 48%.
Notísia relevante: Xefe Estadu husu Governu iha orsamentu 2026 tau prioridade ba labarik no inan isin-rua
Jornalista : Nelson de Sousa
Editora : Rita Almeida
