DILI, 25 Agostu 2025 (TATOLI) – Sekretaria Estadu Floresta (SEF) arrekada, iha Janeiru to’o Jullu tinan ne’e, reseita hamutuk $82.572,99 ba kofre Estadu.
Sekretáriu Estadu tutela, Fernandino Vieira da Costa, hateten reseita sira ne’e mai husi fa’an produtu florestál, inklui madeira no produtu la’ós madeira.
“Kada tinan ita la’ós utiliza de’it Orsamentu Jerál Estadu, maibé mós barak ka uitoan ita sempre rekolla reseita ba kofre Estadu”, governante ne’e dehan ba Tatoli iha nia knaar fatin, Kaikoli, Dili, ohin.
Nia esplika katak reseita ne’e mai husi lisensa tula ai-teka metan no mutin, lisensa tula ai-sunu, no ai-sunu ne’ebé guarda florestál halo apreensaun, no reseita mai husi mós lisensa esportasaun ai-teka, inklui kutulák no tali-musan.
Tuir nia, atividade ne’ebé sira halo hodi rekolla reseita ba iha produtu floresta ne’e iha rua mak lisensa tula no tesi ai bazeia ba despaixu Ministériu Agrikultura, Pekuária, Peska no Floresta númeru 10/2011, no depaixu husi liña jerál floresta nian númeru 70/2020, ho baze legál sira husi atividade halo atendimentu ba komunidade.
Lisensa seluk mak Diresaun-Jerál Floresta fó ba komunidade atu tesi ai sira ne’ebé populasaun rasik mak kuda hanesan ai-keta metan, mutin, ai-mahoni, no bandu komunidade tesi ai sira ne’ebé moris ho naturál hanesan ai-kiar, fukira, ai-bubur, ai-kameli no seluk tan.
Nia akresenta katak lisensa tula ai ne’ebé komunidade selu ba MAPPF bazeia ba metru kúbiku hanesan ai-teka metan $25/m3, ai-teka mutin no ai-mahoni $15/m3.
Notísia relevante: SEF kontinua apela ba komunidade hamutuk dezenvolve setór floresta
Jornalista: Arminda Fonseca
Editora: Maria Auxiliadora
