DILI, 27 Agostu 2025 (TATOLI)—Governu Timor-Leste liuhusi Ministériu Komérsiu no Indústria (MKI) realiza aban (28/08) Dili Internasionál Trade Expo dahuluk iha Timor-Leste.
Ministru Komérsiu no Indústria, Filipus Nino Pereira, hateten Espozisaun Komersiál Internasionál Dili 2025 sei hala’o iha Sentru Konvensaun Dili, husi loron 28 Agostu to’o loron 1 Setembru 2025. Objetivu no misaun mak atu halibur nasaun sira, empreza ki’ik no médiu sira, negosiante sira, Organizasaun Naun-Governamentál (ONG) no governamentál sira hodi aprezenta sira-nia susesu, hatudu inovasaun sira iha kultura no teknolojia, no promove kolaborasaun entre setór oioin.
“Preparadu ona ein termu lojístiku, fatin feira no seluk tan, no konfirmadu emprezáriu 250 mak sei partisipa, husi númeru ne’e emprezáriu timoroan 157 no internasionál 93”, Nino Pereira hateten.
Tuir nia, nasaun sira ne’ebé konfirmadu partisipa iha eventu ne’e mak hanesan Xina, Makau, Indonézia, Kamboja, Malázia, Singapura, Fiji, Índia no Austrália.
“Tuir dadus, bainaka sira husi rai-li’ur hamutuk 229. Ita espera husi feira ne’e bele konekta ita-nia emprezáriu nasionál husi médiu no pekena empreza ho rai-li’ur hodi promove ita-nia produtu, bele iha oportunidade negósiu ba emprezáriu sira husi li’ur mai investe”, nia dehan.
Bainaka sira hahú mai Timor-Leste husi loron 25 to’o 27 Agostu no ohin ministériu mós realiza enkontru bilaterál ho delegasaun husi rai-li’ur hanesan Diretór Dezenvolvimentu Emprezariál Brunei, Norlela Suhailee, Sekretáriu Estadu, Ministériu Komérsiu no Xefe Delegasaun, Reinu Kamboja, Pich Rithi, Delegasaun Asosiasaun Agrikultór Indonézia, LetJend Bachtiar Utomo, no seluk tan.
Governante ne’e subliña katak objetivu husi hasoru malu ho delegasaun sira ne’e hodi ko’alia kona-ba kooperasaun liuhusi setór industria no seluk tan.
Espozisaun internasionál ne’e sei inklui programa oinoin, hanesan promove negósiu no produtu, talk show (debate), sorumutu business match-making, asinatura memorandu entendimentu (MoU) entre empreza sira, espozisaun arte no kultura, aprezentasaun múzika ho artista nasionál sira, aprezentasaun husi universidade no empreza sira kona-ba peskiza no inovasaun, aprezentasaun oportunidade negósiu no investimentu husi ajénsia governamentál sira no Kámara Komérsiu no Indústria Timor-Leste (CCI-TL), nomós aprezentasaun kona-ba apoiu empréstimu no kréditu husi BNCTL.
Espozisaun ne’e sei hatudu pavillaun sira ho tema “Oportunidade networking no esperiénsia kulturál hodi enkoraja koneksaun globál”. Tanba Timor-Leste nu’udar membru OMK no iha hela prosesu atu adere ba ASEAN.
Eventu ida-ne’e sei sai nu’udar eventu dahuluk husi tipu ida-ne’e atu to’o iha merkadu mundiál. Sei fó oportunidade ba komersiante, fabrikante no industriál nasionál no internasionál sira atu kolabora no investe iha Timor-Leste. Konseitu “make it and brand it” hakarak koloka produtu “Made in Timor-Leste” iha merkadu ASEAN no merkadu mundiál.
Jornalista : Arminda Fonseca
Editora : Maria Auxiliadora
