BOBONARU, 02 Setembru 2025 (TATOLI)—Komunidade ho lider komunitáriu sira ezije ba instituisaun relevante atu aselera konkursu públiku ba projetu reablitasaun estrada urbana iha Postu Administrativu Lolotoe, Munisípiu Bobonaru nune’e bele implementa iha tempu badak.
Xefe Suku Opa, Moises da Costa informa kondisaun fízika estrada atuál aat grave, tan ne’e difikulta tebes movimentasaun komunidade iha tempu udan.
“Ami rona estrada husi Lontas ba Lolotoe Vila ne’e komesa loke ona konkursu no parese tinan 2026 ne’e implementa ona. Ida-ne’e ami autoridade lokál ezije atu aselera konkursu para sira bele halo buat ruma iha ita-nia Munisípiu Bobonaru,” nia hateten ba jornalista sira iha Maliana, foin lalais ne’e
Moises dehan bainhira Governu la konsege implementa projetu ne’e iha tinan oin, sei kontinua afeta ba atividade ekonomia komunidade no seluk tan.
Notísia relevante: Komunidade solisita MOP halais implementasaun projetu estrada Lolotoe
Xefe Suku ne’e haktuir tinan-tinan komunidade Postu Administrativu Lolotoe halerik ba kondisaun estrada liuliu iha área Zulo-Il, Suku Lontas, tanba sempre hetan estragu husi dezastre naturál iha tempu udan.
“Estrada ne’e importante loos ba komunidade Postu Administrativu Lolotoe. Sira atu lori produtu lokál asesu mai merkadu mós sente araska. Tanba ne’e mak komunidade ezije ba Governu atu aselera konkursu,” nia afirma.
Aleinde ne’e, abitante Lolotoe, Fransisco de Araújo reforsa governu tenke iha konsisténsia hodi implementa projetu ne’e tanba estrada Lolotoe sai preukupasaun públiku durante tinan 20-resin ona.
“Ami Lolotoe tinan-tinan kuandu udan ona la’o bá-mai araska ona. Kareta iha tempu udan ne’e para dei’it. Motór mós di’ak ida tempu udan ita obriga liu mós tenke dudu,” nia esplika.
Enkuantu, reablitasaun estrada urbana Lolotoe Vila ne’e ho distánsia naruk kilómetru 8,9, ho orsamentu ne’ebé prevee hamutuk millaun $13,8.
Jornalista: Sergio da Cruz
Editór: Xisto Freitas da Piedade
