DILI, 03 Setembru 2025 (TATOLI) – Parlamentu Nasionál (PN) aprova ona pedidu vizita ofisiál Prezidente Repúblika (PR), José Ramos-Horta, bá Ukránia , entre loron 10 no 11 Setembru 2025.
Xefe Estadu hato’o pedidu dezlokasaun bá Kiev, Ukránia, hodi partisipa konferénsia internasionál ho tema “Education Shaping the World”.
“Rezultadu votasaun a favór sia, kontra no abstensaun 0″, Segundu Prezidente Parlamentu Nasionál, Alexandrino Afonso Nunes, fó sai iha reuniaun plenária estraordinária Komisaun Permanente iha sala plenária, ohin.
Simeira internasionál iha Kiev konstitui oportunidade singulár hodi fortalese lasu globál iha área edukasaun, promove interkámbiu koñesimentu no parseria estratéjiku ba dezenvolvimentu umanu no sosiál país.
Xefe Estadu informa mós hala’o ninia viajen privada bá Indonézia, entre loron 6 no 7 Setembru ne’e, hodi atende konvite husi Fundadór no Prezidente Foreign Policy Community of Indonesia (FPCI), Dino Patti Djalal, hodi partisipa iha ASEAN For the People Conference (AFPC) iha Jakarta.
Destaka eventu estratéjiku ho importánsia boot no diplomátika ba Timor-Leste, konferénsia rejionál Asosiasaun Nasaun Sudeste Aziátiku (ASEAN, sigla inglés) reúne organizasaun sosiedade sivíl 200-resin husi Estadu-membru ho apoiu husi sekretáriu-jerál ASEAN, reforsa promosaun ASEAN sentrál iha ema.
Nune’e Xefe Estadu sei auzénsia husi Timor-Leste entre 05-13 Setembru 2025.
Notísia relevante: PR Ramos-Horta hala’o vizita ofisiál ba Japaun
Jornalista: Nelson de Sousa
Editora: Maria Auxiliadora
