VIKEKE, 16 Setembru 2025 (TATOLI) –Grupu Lekimalik, husi Suku Maki’ik, Postu Administrativu Vikeke Vila, Munisípiu Vikeke, ho inisiativa rasik tau osan hamutuk hodi prepara fatin ba haki’ak animál hanesan fahi no manu.
“Atividade ida-ne’e ami-nia inisiativa. Tanba ami serbisu laiha ne’e mak hakarak halo serbisu ba ami-nia aan. Nune’e mós ami-nia rai abandona de’it, tan ne’e, ami implementa atividade haki’ak hanesan manu no fahi,” Koordenadór Grupu Lekimalik, Domingos Alves, hateten ba TATOLI, iha Suku Uma Ki’ik, Tersa ne’e.
Nia akresenta, grupu ne’e hahú halo preprasaun hanesan lutu, manu luhan. Daudaun ne’e, fahi hamutuk hitu mak iha ona luhan no manu hamutuk 15.
“Alende ne’e mós ami agora prepara tán kolam atu haki’ak ikan, kolam prepara ona, hein hatama bee hodi husik ikan oan. Ho atividade sira-ne’e ami hakarak hasa’e produsaun animál hodi ajuda ami-nia uma laran,” nia subliña.
Nia dehan, dezafiu ne’ebé grupu enfrenta mak ahi eletrisidade no bee-moos mak laiha nune’e utiliza de’it jeradór hodi apoia ba atividade grupu nian.
Iha fatin hanesan, Membru Grupu Lekimalik, Julio Gomes, haktuir, atividade ne’e hahú implementa iha inísiu tinan-2025, ne’e hahú prepara fatin ba manu no fahi.
“Implementasaun atividade ne’e ami la hetan apoiu ruma, maibé ho komitmentu tau osan hamutuk no empresta Cooperativa Fitun Foin Sa’e nian osan hamutuk $1.000 hodi sosa materiál sira. Espera ba oin parte Governu ruma bele apoiu ami hodi haboot ami-nia atividade,” nia hato’o.
Membru Grupu Lekimalik hamutuk na’in-haat ne’ebé implementa atividade pekuária no peska iha suku Uma Ki’ik.
Jornalista: Vitorino Lopes
Editór: Rafael Ximenes de A. Belo
