DILI, 17 Setembru 2025 (TATOLI) – Sekretaria Estadu Kooperativa (SEKoop) kolleta ona Bafo Kayrala tonelada 88 iha munisípiu Lautein, Likisá, Manatutu, Vikeke, Kovalima, Manufahi, Bobonaru, no Rejiaun Administrativu Espesiál Oekusi Ambenu.
Sekretáriu Estadu tutela, Arsénio Pereira, dehan SEKoop iha alvu atu kuda Bafo Kayrala iha rai ektare 710, maibe foin kultiva iha ektare 44. “Ita halo kalkulasaun kada ektare ida ita hetan tonelada rua, nune’e kolleta ona 88”, Arsénio Pereira dehan ba Tatoli, iha Akait, Dili.
Nia esplika katak tonelada 88 ne’e mai husi parseiru Movimentu Kamponés Timor-Leste (MOKATIL) ne’ebé Governu fó subvensaun hodi kuda Bafo no grupu kooperativa balun mós.
Ho produsaun Bafo Karyrala ne’ebé hatudu progresu di’ak, SEKoop mós koordena ona eskola balun iha Manufahi atu kontribui ba merenda eskolár.
Nia subliña katak Bafo Kayrala bele implementa iha merenda eskolár, tanba tinan ida bele kolleta dala rua ka tolu, nune’e sufisiente atu apoia ba programa ne’e.
“Produtu ne’e rasik halo ona ba hahán oin-oin hanesan paun, dose, sasoro, no iha ha’u-nia atividade sempre lori produtu hirak ne’e, fahe atu halo promosaun, oinsá motiva komunidade sira atu kuda Bafo”, salienta.
Nia mós husu ba komunidade sira atu kuda hahán ne’ebé iha nutrisaun ba sira iha idaidak nia munisípiu, tanba Timor-Leste iha potensialidade agríkola.
Lembra katak, iha loron 10 Maiu 2024, SEKoop asina akordu ho MOKATIL hodi oferese subvensaun ho montante $535.500, hodi implementa programa kamponés.
Notísia relevante: SEKoop oferese subvensaun ba MOKATIL hodi implementa programa kamponéz
Jornalista: Arminda Fonseca
Editora: Maria Auxiliadora
