DILI, 17 Setembru 2025 (TATOLI)–Membru Polísia Nasionál Timor-Leste husi Unidade Espesiál Polísia (UEP) na’in-rua hetan kanek durante manifestaun iha loron datoluk nian, iha Parlamentu Nasionál oin.
Durante manifestasaun, hahú tuku 09:00 dadeer to’o tuku 13:00 situasaun la’o kondizivu no hakmatek, manifestante sira hato’o sira-nia aspirasaun, maibé iha tuku 14:00 mosu dizentendimentu, anarkizmu to’o manifestante sira tuda parte seguransa, nune’e rezulta membru Polísia ida hetan pankada iha oin no seluk hetan tuda iha ain.
Inspetór Polísia Virgílio Soares haktuir, nia hamutuk ho membru Polísia seluk hetan tuda bainhira fó seguransa ba iha portaun Parlamentu.
“Ami rua mak hetan tuda, daudaun ha’u-nia kolega mak hala’o hela tratamentu saúde iha laran, nia hetan pankada maka’as iha parte hasan tanba fatuk kona maka’as. Ha’u kona iha ain,” Inspetór Polísia ne’e hato’o ba Ajénsia TATOLI, iha resintu Parlamentu Nasionál, Kuarta ne’e.
Notísia relevante : Komandu PNTL halo enkontru koordenasaun ho portavós manifestante na’in-10
Tuir observasaun Jornalista iha terrenu, nota katak daudaun situasaun iha resintu Universidade Nasionál Timor-Leste (UNTL) nian hahú konduzivu fali hafoin Autoridade Seguransa atua situasaun.
Manifestante sira ne’ebé kompostu husi estudante universitáriu no sosiedade sivil inklui entidade oinoin kontinua hato’o sira-nia ezijénsia haat ba Parlamentu no Governu hanesan hapara kultura sosa luxu ba membru foun Parlamentu, halo altersaun ba Lei Pensaun Vitalísia, altersaun ba Lei Manifetasaun no Liberdade Reuniaun no husu aloka orsamentu ho persentajen boot setór produtivu no infraestrutura iha baze.
Iha loron Tersa (16/09) Parlamentu Nasionál liuhusi sesaun plenária estraordinária, aprova ho unanimidade rezolusaun kansela akizisaun karreta ba membru 65 Parlamentu.
Jornalista : Natalino Costa
Editora : Julia Chatarina
