VIKEKE, 30 Setembru 2025 (TATOLI)—Organizasaun internasionál Adventist Development and Relief Agency (ADRA-sigla ingleza) iha Timor-Leste estabelese grupu rai no impresta osan hamutuk 13 nune’e komunidade tau osan hamutuk hadi’a ekonomia família uma-laran.
“Programa ADRA ba rai no impresta osan ne’e objetivu atu hadi’a komunidade nia ekonómia iha baze. Grupu ne’e agora kontinua ativu. Ho ida-ne’e ami haree sirkulasaun komunidade Vikeke nia osan la’o di’ak tebes tanba sira-nia tau osan hamutuk hodi fó empréstimu ba sira-nia membru sira-ne’ebé envolve iha grupu,” Koordenadór ADRA, Alberto Guterres hateten ba TATOLI iha Postu Vikeke Vila, Tersa ne’e.
Nia dehan, bainhira ba empresta osan iha banku prosesu naruk, dalaruma to’o fulan tolu mak foin sai no karik emerjénsia ruma hakarak asesu lalais osan ne’e difísil.
“Ita impresta husi banku ne’e prosesu bele to’o fulan rua to’o tolu, maibé urjente ruma ita labele foti osan. Programa ida-ne’e fasilita tebes ba ita-nia komunidade. Sira rasik mak rai no sira mak asesu fali sira-nia osan ho regra sira-ne’ebé sira deside hamutuk,” Alberto esplika.
Tuir dadus, husi grupu 13 ba rai no impresta osan ne’e ho totál membru hamutuk na’in-323, kompostu feto na’in-120 no mane na’in-203. Husi grupu 13 ne’e sira rai ona orsamentu totál hamutuk $81.358,50.
Jornalista: Vitorino Lopez da Costa
Editór: Xisto Freitas da Piedade
