DILI, 30 Setembru 2025 (TATOLI)–Ministru Justisa (MJ), Sergio Hornai, hateten Governu nia pozisaun klaru no la admite jogu online ne’ebé hala’o iha Timor-Leste kontráriu ho lei ne’ebé iha ona.
“Jogu online, ita la admite, Estadu ida ne’e, Estadu Direitu, ema hotu iha lei nia oin, ita bele halo admisaun de’it ba buat hirak ne’ebé sai no tama tuir de’it lei. Se jogu online ida kontráriu ho lei, ita la admite,” Ministru ne’e hateten ba jornalista sira iha Palásiu Prezidensiál Nicolau Lobato, Bairu Pite, tersa ne’e.
Nia dehan, iha jogu online hirak ne’ebé kontra lei mak sidadaun ruma envolve iha laran tenke responsabiliza.
“Se ema ruma envolve iha jogu hirak ne’ebé identifika kontra lei, nia rasik responsabiliza ba nia aktu ne’ebé nia rasik halo, maibé tenke liuhusi prosesu ida justu. Iha instituisaun propriu atu haree buat ida-ne’e,” nia dehan.
Ministru ne’e hatten, la admite saida de’it mak akontese kontra lei no nia rasik hanesan Ministru Justisa ne’ebé servisu hamutuk mós ho Ministru Negósiu Estranjeiru no Kooperasaun (MNEK) hodi haree ba brankeamentu kapitál, finasiamentu terorizmu labele mosu ina nasaun ne’e.
“Servisu sira hotu kona-ba brankeamentu kapitál, finansiamentu terorizmu ambrela ba iha Polísia Sientífiku Investigasaun Kriminál (PSIK) instroi atu labele mosu atividade elísitu iha ita-nia nasaun,” nia hateten.
Antes ne’e, Diretór PSIK, Vicente Fernades e Brito kompromete sei intensifika serbisu hamutuk ho parseiru International Police (INTERPOL) hodi kontinua buka tuir jogu ilísitu no online scam iha Timor-Leste.
PCIC no entidade seguransa seluk konsege harahun no rekolla faktu ba rede krime organizadu transnasionál ne’ebé espalla iha Timor-Leste, liuliu iha Oekusi hodi prosesa iha Tribunál.
Prova ne’ebé PCIC rekolla iha duni elementu sufisiente atu bele konklui katak krime online scam ne’e akontese iha Oekusi. Tanba ne’e, iha arguidu na’in-neen (6), balun iha ona prizaun preventiva.
Nia nota husi relatóriu Organizasaun Nasaun Unida (ONU) nian, dekreve katak krime online scam mai duni husi Tailándia no tama iha Timor-Leste, maibé Timor-Leste ninia intervensaun ba krime referidu rápidu tebes.
PSIK serbisu hamutuk ho parseiru INTERPOL detekta iha duni krime jogu ilísitu no online scam eziste iha rai-laran.
Diretór PSIK admite, iha duni rede organizadu transnasionál ba krime jogu ilísitu no scam online, maibé iha elementu sufiente katak iha ema na’in-tolu ka haat mak envolve iha organizasaun sindikatu maibé buat hotu-hotu iha faze investigasaun.
Nia rekoñese, PSIK nia intervensaun ba kazu ne’e importante ba rai ne’e, liuliu medida reprezivu ne’ebé persiza reforsa tanba hatudu ba mundu katak Timor-leste iha pasu pozitivu, kompromisu no vontade atu kombate krime hirak ne’e.
Notísia Relevante: Ministru Interiór: “krime online scam ne’e ita entrega ba investigasaun”
Jornalista : Hortencio Sanchez
Editór : Cancio Ximenes
