OEKUSI, 03 Outubru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, prevee orsamentu hamutuk rihun $67,786.50 hodi halo reabilitasaun ba jestaun operasun portu Iwao Kitahara Mahata hodi alarga-tan ba parte leste nian.
Tanba ne’e, Prezidente Autoridade RAEOA, Régio da Cruz Salu, hateten katak, antes autoridade anúnsia konkursu públiku atu reabilita, autoridade RAEOA konsulta uluk ho Autoridade Portuáriu Timor-Leste, Institutu Públiku (APORTIL,I.P) no parseiriu Ajénsia Kooperasaun Internasionál Japonés (JICA, sigla inglés).
“Portu Mahata, ha’u hakarak hateten, primeira semana, ha’u kuandu hahú serbisu, ha’u komunika kedas APORTIL,I.P –hala’o enkontru ida ho ita-nia parseiru JICA antes ha’u atu aprova konstrusaun ne’e. Sira espresa kompromisu ida mai ita katak atu extende ita-nia portu, atu portu ne’e labele serbi de’it ba pasajeirau maibé serbí mós atividade sira seluk, no atu simu atrakasaun kontentór sira, tantu rai-laran no rai-li’ur,” Régio da Cruz Salu iha Oekusi, dehan ohin.
Notísia relevante:MTK koordena Autoridade RAEOA atu alarga tán portu Iwao Kitahara Mahata
Nia esplika katak prosesu ne’e, inísia kedas husi Autoridade Sesante, tanba ne’e nesesáriu nu’udar investimentu públiku ida iha Oekusi, atu prepara ba futuru implementasaun polítika Free Trade Zone (Zona Komérsiu Livre).
“Tanba depois tinan ne’e, ho prosesu harii enkuadramentu legál lei kona-ba ZEEDOA nian, alende ZEEDOA hamriik hanesan instituisaun administrativa própriu ida iha RAEOA nia okos, maibé buat balun liga ba merkadu free trade zone (zona perdagangan bebas), ne’ebé la presiza hein buat bo’ot maibé ki’ikoan, ezemplu karau husi Oekusi bele sai ba li’ur tanba ita harii ona sentru tránzitu, entaun ita-nia produtu balun bele exporta ba li’ur, karik husi sorin hakarak uza ita-nia portu, bele serbisu hamutuk, importante agora ita tenke kria uluk kondisaun,” nia hateten.
Ezekutivu ne’e informa, prosesu konkursu públiku anúnsia ona, nune’e iha tempu-badak husi Autoridade RAEOA ho empreza selebra akordu kontratu definitiue ida hodi hahú faze konstrusaun.
Notísia relevante:JICA sei halo estudu idrográfika iha Oé-Cusse atu dezenvolve portu Mahata
Entretantu, projetu reabilitasaun ba jestaun operasun portu Iwao Kitahara Mahata ne’e, sei ezekuta husi empreza Sulat Alebo Unipesoál Lda ho valór $67,786.50.
Notísia relevante:APORTIL, I.P hala’o serimónia kulturál iha Portu Oé-cusse hodi husu matak malirin
Jornalista: Abílio Elo Nini
Editór: Rafael Ximenes de A. Belo
