OÉ-CUSSE, 14 dezembru 2024 (TATOLI)—Autoridade Portuáriu Timor-Leste, Institutu Públiku (Aportil, I.P), sábadu ne’e, hamutuk ho lia-na’in sira husi aldeia Mahata, suku Costa, hala’o serimónia kulturál iha Portu Iwao Kitahara Mahata iha Rejiaun Administrativa Espesiál Oé-Cusse Ambeno (RAEOA) hodi husu matak malirin, nune’e bele hala’o atividade portuáriu ho seguru.
Diretór Jerál Administrasaun no Finansa husi Ministériu Transporte no Komunikasaun (MTK), Aniceto Leto Soro, hateten, prezensa APORTIL iha Oé-cusse importante tanba hanesan órgaun autónomu administrasaun finansa no patrimóniu, ne’ebé iha kompeténsia atu haree no jere administrasaun portu sira iha territóriu nasionál tomak, jere ho didi’ak no rekolla taxa ba Estadu atu kontribui ba dezenvolvimentu nasionál.
“Atividade ne’e atu hametin liután servisu ligadu ho asuntu portu nian, ne’ebé hahú ona dezde Governu anteriór iha Oé-cusse depois Governu foun ne’e kontinua, hakarak hadi’a di’ak liután, nune’e bele rekolla reseita maka’as ba Estadu tanba atu hetan reseita ne’ebé di’ak, ita persiza husu tulun mós liuhusi serimónia kulturál , nune’e atividade hotu bele iha rezultadu di’ak ba povu no dezenvolvimentu RAEOA. Ohin ita oho animál, ne’e katak hatudu ita-nia identidade atu agradese no husu nafatin matak malirin ba Maromak, matebian sira no natureza, nune’e movimentu ne’ebé liga hotu ho transporte marrítima bele hetan rezultadu di’ak,” Reprezentante husi MTK hato’o iha Portu Iwao Kitahara Mahata Oé-cusse.
Notísia relevante : Governu husu APORTIL muda oráriu Ró Berlin Ramelau ba Oé-Cusse
Iha fatin hanesan, Prezidente interinu APORTIL, I.P, Leandro de Sena, haktuir, órgaun Estadu ne’e eziste bazeia ba lei númeru 3/2003, ba kriasaun portu sira, ne’ebé APORTIL mak iha responsabilidade iha territóriu tomak hafoin halo liña koordenasaun ho Oé-cusse hanesan Rejiaun Espesiál maibé la ses mós husi Governu Sentrál.
“Iha mudansa ne’ebé mak hakarak ita halo, maibé ba oin ita presiza halo di’ak liután mak iha Oé-cusse eziste ona Autoridade RAEOA no APORTIL mós eziste bazeia ba lei númeru 3/2003, ne’ebé fó kompeténsia ba APORTIL hanesan autoridade administrasaun iha povu Timor-Leste, maski portu ne’e hamriik iha Oé-cusse maibé tanba Timor-Leste, APORTIL iha devér morál no responsabilidade atu tau-matan ba prosesu ba sira-ne’e hotu,” nia akresenta.
Notísia relevante : APORTIL rekolla reseita hamutuk liu rihun $170 ba kofre Estadu
Nune’e mós, Responsavél Vogál 1 iha APORTIL, I.P, Júlio Saldanha Barreto, informa, daudaun ne’e institutu destaka funsionáriu hamutuk na’in-41 atu haforsa taan servisu iha Portu Iwao Kitahara Mahata Oé-cusse.
“Ita tenta nafatin kontaktu no halo liña koordenasaun hamutuk, nune’e ba oin ita sei serbisu hamutuk tanba ho prezensa husi funsionáriu 41 iha Portu Mahata, ita fahe ba departementu lima, iha Diretór Rejionál ida, Departementu rua ho Sesaun ida inklui seguránsa no infraestrutura,” nia informa.
Júlio Saldanha Barreto dehan, funsionáriu sira-nia prezensa mak atu hadi’a di’ak liután atendimentu ba pasajeiru sira-ne’ebé mak halo movimentu husi Dili mai Oé-cusse no husi Oé-cusse ba Dili.
“Ita haree reseita iha mudansa boot tebes, númeru ha’u la fiksa maibé ha’u dehan de’it iha mudansa duni ba reseita husi portu sira, tanba mai iha Oé-cusse besik fulan-neen ona, jestaun ida-ne’e ita muda. Kada Governu mai ho nia polítika ho intensaun halo mudansa depois povu mak sente,” nia katak.
Jornalista : Abílio Elo Nini
Editora : Julia Chatarina
