DILI, 07 Outubru 2025 (TATOLI)—Konsellu Imprensa rejistu jornalista na’in-10 husi plataforma mídia oioin submete dokumentu ba kompetisaun prémiu “Balibo Five” ne’ebé sei anúnsia manán-na’in iha selebrasaun loron Balibo Five ba da-50 no Loron Nasionál ba Liberdade Imprensa, iha Suku Balibo Villa, Postu Administrativu Balibo, Munisípiu Bobonaro.
Notísia Relevante: CI propoin ba Ramos-Horta kondekora jornalista na’in-lima mate iha Balibo
Diretór Ezekutivu Konsellu Imprensa, António Dias, hateten jornalista sira-ne’ebé submete dokumentu ba kompetisaun hakerek notísia ba kategória neen ne’e, Konsellu Imprensa identifika ona manán-na’in sira.
“Aplikante ba kompetisaun sira-ne’e ita iha hotu ona. Iha jornalista na’in 10 mak submete dokumentu, maske antes ne’e ami rejistu kandidatu na’in-12 mak konkorre maibé na’in-rua ne’e la admitidu tanba dokumentu la kompletu,” Diretór Ezekutivu ne’e informa ba Agência Tatoli iha nia kna’ar fatin, ohin.
Tuir nia, husi aplikante na’in-10 ne’e Konsellu Imprensa sei anúnsia manán-na’in iha loron ofisiál ba atividade (malam puncak) komemorasaun loron Balibo Five no Loron Nasionál Liberdade Imprensa, ne’ebé sei akontete iha loron 16 fulan-Outobru tinan 2025.
“Ami sei konvida aplikante sira no jornalista sira seluk, tanba se la’e konvida mak manán-na’in de’it ne’e, aplikante sira hatene ona tanba ne’e segredu ita labele fó sai lai sé mak sai manán-na’in,” nia dehan.
Enkuantu, kategória ba kompetisaun ne’e mak hanesan Prémiu Balibo Five (the best media awards), Prémiu Adelino Gomes, Prémiu Francisco Borja da Costa, Prémiu Greg Shackleton no Prémiu Bernardino Guterres.
Notísia Relevante: KI lansa kompetisaun prémiu “Balibo Five” ba jornalista sira
Jornalista : Alexandra da Costa
Editór : Cancio Ximenes
