DILI, 07 Outubru 2025 (TATOLI)-Deputada husi Partidu Frente Revolusionária Timor-Leste Indepedente (FRETILIN), Lídia Norberta, husu ba vítima asédiu seksuál halo keixa ba entidade relevante bainhira hetan violénsia, tanba asédiu seksuál ne’e krime públiku.
Deputada hato’o kestaun ne’e relasiona ho dosente ida husi Universidade Nasionál Timor Lorosa’e (UNTL) ne’ebé deskonfia halo asédiu hasoru estudante feto.
Lídia Norberta salienta katak nu’udar feto husi bankada FRETILIN hato’o solidariedade ba vítima nia aten-brani hodi bele halo denúnsia.
Hodi enkoraza feto-maluk hotu ne’ebé durante ne’e sai vítima atu labele nonok. “Asédiu seksuál ne’e krime públiku, ida-ne’e ita labele nonok. Nu’udar feto estudante tenke haree asuntu ne’e, hotu-hotu luta”, nia hato’o liuhusi reuniaun plenária Parlamentu, ohin.
Nune’e mós deputada husi Partidu Kongresu Nasionál Rekonstrusaun Timorense (CNRT), Aliança da Conceição Araújo, no Maria Gorumali Barreto, reforsa katak feto ne’ebé sai vítima labele nonok hodi hato’o keixa ba polísia no Ministériu Públiku hodi prosesa tuir dalan legál.
Aleinde ne’e deputada CNRT, Gabriel Soares, la aseita mós ho prátika aktu ne’e iha eskola sira.
Notísia relevante: https://tatoli.tl/2025/10/06/suspeitadu-ba-asediu-sexual-estudante-husu-reitor-demite-mfb/
Jornalista: Nelson de Sousa
Editora: Maria Auxiliadora
