DILI, 09 Outubru 2025 (TATOLI)—Sekretáriu Estadu Komunikasaun Sosiál (SEKOMS), Expedito Loro Dias Ximenes, hateten Prezidente Repúblika, José Ramos-Horta, sei halo abertura no Primeiru-Ministru Kay Rala Xanana Gusmão sei halo reflesaun iha selebrasaun loron “Balibo Five” ba da-50 ne’ebé sei realiza iha Suku Balibo Vila, Postu Administrativu Balibo, Munisípiu Bobonaru.
Notísia Relevante: CI propoin ba Ramos-Horta kondekora jornalista na’in-lima mate iha Balibo
“Ami koordena ona ho Prezidente da Repúblika atu partisipa hodi halo abertura ba atividade ofisiál ne’ebé akontese iha loron 16 fulan-Outobru, inklui mós prezensa husi Primeiru-Ministru Kay Rala Xanana Gusmao mak sei prienxe iha programa reflesaun nian,” Sekretáriu Estadu ne’e informa ba jornalista sira iha ninia kna’ar fatin, Palásiu Governu, kuarta ne’e.
Nia hatutan, atividade ne’e Konsellu Imprensa servisu hamutuk ho Sekretária Estadu Komunikasaun Sosiál ne’ebé destaka programa oioin iha eventu ne’e rasik.
Tamba, nia dehan, istória “Balibo Five” ne’ebé hamosu trajédia ba jornalista na’in-lima husi Austrália no Inglaterra hetan oho husi militante Indonézia nian, bainhira iha tempu defisíl maibé sira esforsu buka lia-loos no hatudu duni sira-nia eroizmu hodi sai ema mensajeiru ba informasaun.
“Jornalista hirak ne’e labele fila-fali ba sira-nia rai hamutuk ho família maibé sira konsege fó an ba mate hodi defende lia-loos,” nia dehan.
Governu realiza eventu ne’e hodi fó lembransa ka memória forte ba jornalista na’in-lima (5) nia moris ne’ebé defende lia-loos ba Timor-Leste no hein katak jornalista jerasaun foun sei nafatin banati tuir ezemplu husi jornalista na’in-lima ne’e.
Notísia Relevante: Jornalista na’in-10 submete dokumentu ba kompetisaun prémiu “Balibo Five”
Jornalista : Alexandra da Costa
Editór : Cancio Ximenes
