DILI, 20 Outobru 2025 (TATOLI)–Prokuradór Jerál Repúblika (PGR, sigla portugés), Nelson de Carvalho hateten, investigasaun ba Ró Haksolok kuaze to’o ona konkluzaun.
“Faze investigasaun iha ona 70%, entaun hela 30%. Maibé ida-ne’e pertense ba iha Prokuradór Titulár ninia serbisu. Ba ida-ne’e informasaun ha’u iha. Portantu ida-ne’e ha’u labele ko’alia,” Prokuradór hato’o ba Jornalista Sira, hafoin ramata halo audiénsia públika ba PGR nia orsamentu tinan 2026 nian, iha Parlamentu Nasionál (PN), Segunda ne’e.
Prokuradór iha biban ne’e rejeita fó sai ema ne’ebé envolve iha kazu ne’e tanba iha hela faze investigasaun.
“Kona-ba ema, ita-boot sira hatene liu ha’u. Ha’u foin mai iha fulan-lima. Ema barak ne’ebé envolve kazu ne’e ita-boot sira hatene, sé sé ne’e ita-boot sira hatene liu ha’u,” nia akresenta.
Tuir PGR, prosesu husi kazu Ró Haksolok sei mosu tan faktus, tanba ne’e bainhira konklui maka sei fó sai.
“Ema sira ne’ebé envolve kazu Ró Haksolok ne’e la’ós ona segredu, maibé ema hatene hotu sé mak envolve inklui jornalista sira hatene hotu, ne’ebé Ministériu Públiku la presiza promúnsia tan,” nia tenik.
Notísia relevante : Komisaun C husu Ministériu Públiku tau atensaun sériu ba kazu Ró Haksolok
Iha sorin seluk, Nelson de Carvalho rekoñese katak kazu Ró Haksolok ne’e ninian prosesu komplesu tebes, tanba ne’e la’o kleur maibé agora Prokuradór Titulár bele konklui ona nia prosesu sira.
Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál hosi empreza Atlantic Eagle Ship Building ho sub-kontratór maka to’o agora ró seidauk mai.
Ró ne’e rasik iha kapasidade atu tula ema na’in-377 no karreta hamutuk 15.
Prosesu kontrusaun Ró Haksolok ninia kontratu asina iha tinan 2014 entre Governu no empreza portugués. Konstrusaun ró ne’e konsege parradu maibé bainhira estabelese Zona Espesiál Ekonomia Sosiál Merkadu (ZEESM), prosesu kontrusaun ró-ahi ne’e entrega ba Autoridade mak responsabiliza.
Desizaun atu hili ninia estalleiru (fatin atu harii ró) hahú no foti husi V Governu Konstitusionál, ne’ebé selebra kontratu ho estaleiro Atlantic Eagle Ship Building Lda. (Atlanticeagle) iha loron 22 setembru 2014.
RAEOA simu prosesu konstrusaun ró liuhusi transferénsia projetu no alokasaun orsamentu husi Governu Timor-Leste.
Parlamentu Nasionál (PN), liuhusi Komisaun C ne’ebé responsavel ba Asuntu Finansa Públika, sei halo vizita bá Portugál iha Jullu ne’e, hodi realiza estudu komparativu no haree direta konstrusaun ró Haksolok, ne’ebé to’o agora seidauk bele to’o Timor-Leste.
Antes ne’e, Komisaun C iha Parlamentu Nasionál (PN) ne’ebé trata Asuntu Finansa Públika, alerta ba Ministériu Públiku atu tau atensaun sériu ba kazu Ró Haksolok tanba bainhira membru komisaun halo vizita traballu iha loron 25 fulan Jullu 2025 liubá iha fatin estaleiru Atlantic Eagle iha Portugál, nota iha irregularidade barak.
Tuir Komisaun C nia relatóriu fiskalizasaun, antes ne’e Parlamentu aprova orsamentu atu aloka ba ró ne’e dahuluk millaun $17, tuir fali millaun $14 no ikus kuaze millaun $4.
Jornalista : Natalino Costa
Editora : Julia Chatarina
