OEKUSI, 22 Outubru 2025 (TATOLI) – Kuda hamutuk 56 inklui kuda inan-tolu tersa ne’e, hahú hala’o kompetisaun iha pista kuda suku Cunha sub-rejiaun pante Makasar Rejiaun Administrativa Espesiál Oekusi Ambeno (RAEOA) hodi komemora loron mundiál risku dezastre ne’ebé sei organiza husi Autoridade Protesaun Sívil (APC).
Notísia relevante:ACCOA husu Autoridade RAEOA orienta empreza finaliza projetu pista kuda iha Cunha
Tanba ne’e, Prezidente Asosiasaun Corrida Cavalo Oekusi Ambeno (ACCOA), Mario Muni Salu, agradese tanba inisiativa kompetisaun ne’e mai husi APC koordena ho Asosiasaun Corrida Cavalo Oekusi Ambeno, atu anima kuda na’in-sira hodi hanoin hikas loron mundiál risku dezastre naturál iha mundu espesialmente iha Oekusi.
“Kompetisaun ne’e, envolve kuda 56 inklui kuda inan tolu maioria kuda lokál de’it, mai husi sub-rejiaun Oésilo, Pássabe, Nítibe inklui Pante Makasar, nu’udar asosiasaun kuda iha Oekusi agradese ba APC tanba envolve atividade kuda iha loron mundiál dezastre nian,” nia hateten iha sesaun abertura hala’o iha pista kuda iha suku Cunha sub-rejiaun Pante Makasar.
Nia esplika, objetivu asosiasaun kuda eziste iha Oekusi hamutuk ho kuda na’in-sira, atu hamosu kompetisaun kuda nu’udar desportu kulturál, tanba dezde tempu bei-ala sira to’o jerasaun tuirmai tenke promove kuda sira, nune’e bele motiva kuda na’in-sira badinas haki’ak kuda.
“Tanba uluk avo sira konsidera kuda hanesan meiu transporte prinsipál,” nia afirma.
Notísia relevante:Kuda 92 husi NTT no Timor-Leste kompete malu iha Oé-Cusse
Koordenadór APC Oekusi, João Sila, agradese tanba kompetisaun korrida ne’e, la integra iha ajenda Autoridade Protesaun Sívil ba loron mundiál dezastre nian, maibé ho inisiátiva liuhusi koordenasaun ho asosiasaun kuda Oekusi konsege halibúr kuda na’in-sira atu kompete malu.
“Ami apresia tebes, tanba programa ne’e adisionál, só ita iha inisiátiva di’ak no koordenasaun mak bele hatama ba ajenda loron mundiál ne’e, tanba ne’e, kompetisaun nu’udar amizade, limita atu istória malu no diskrimina ba malu, maibé nu’udar Oekusi oan presiza unidade, tanba kada tinan kada eventu ita rasik mak hala’o kompetisaun ne’e, husu atu kumpre nafatin regulamentu sira-ne’ebé asosiasaun hasai ona,” nia apela.
Notísia relevante:FOTO ATUÁL: Abertura kompetisaun kuda halai taru iha Oé-Cusse
Entretantu, tuir oráriu atividade kompetisaun corrida ne’e hahú kompetisaun iha loron tersa-feira 21 Outubru, iha kuarta-feira ohin sei kontinua ba semi-finál, no kompetisaun finál sei akontese iha loron kinta-feira 23 Outubru 2025.
Tuir observasaun jornalista Ajénsia Tatoli,I.P nota katak, durante eventu kompetisaun ne’e la’o, hetan apoia seguránsa másimu husi Komandu PNTL Oekusi no hetan apoia mós husi Serbisu Nasionál Ambulánsia Emerjénsia no Medikamentu, Institutu Públiku (SNAEM,I.P).
Loron Mundíal ba Risku Dezastre komemora iha loron 13 Outubru kada tinan, ho objetivu atu aumenta konsientizasaun mundiál kona-ba prevensaun no redusaun risku dezastre naturál.
Jornalista: Abílio Elo Nini
Editór: Rafael Ximenes de A. Belo
