DILI, 22 Outubru 2025 (TATOLI)—Autoridade lokál husi Munisípiu Baukau apoia polítika Timor-Leste adere ba Association of Southeast Asian Nations (ASEAN) no husu Governu kontinua kapasita rekursu umanu.
Xefe Suku Kaibada, Cosme da Costa Lopes, apresia no louva inklui apoia polítika Governu kona-ba adezaun Timor-Leste nu’udár membru ASEAN nune’e sempre preparadu atu hasoru situasaun hotu ligadu ho ekonomia, polítika inklui defeza nasionál.
“Buat hotu ami sempre submete ba Governu sentrál tanba liuhusi prosesu naruk hodi sai membru ASEAN,” Xefe Suku Kaibada informa ba TATOLI iha edifísiu Ministériu Finansa (MF), Aitarak-Laran, Tersa ne’e.
Cosme relata autoridade lokál iha Baukau prontu enfrenta situasaun sira-ne’e hanesan motiva komunidade atu esforsu hasa’e produtu lokál, aseguru rikusoin, hametin kulturál, kria kondisaun liuhusi turizmu komunitáriu no kontribui ba pás no estabilidade iha baze.
Nia konsidera, importante atu Governu sentrál hamutuk ho Autoridade Munisipál Baukau hafoin Timor-Leste adere ona ba ASEAN tenke iha kapasitasaun ba rekursu umanu liuliu kria kondisaun ligadu ho koñesimentu, hasa’e talentu nune’e bele kompetitivu ho nasaun seluk iha ASEAN.
“Importante tebes tanba sei iha benefísiu hanesan hahú husi ita, sei fila bá ita,” Cosme akresenta.
Iha fatin hanesan, Xefe Suku Ossoala, Francisco Gama da Costa Lobo, hateten mezmu foin atu sai membru ASEAN maibé presiza hadi’a infraestrutura husi nasionál to’o rurál nune’e bele preparadu di’ak liután hodi hasoru situasaun ne’ebé sei akontese iha futuru.
“Hakarak ka lakohi ita tenke enfrenta maibé rekomenda atu kontinua kapasita ita-nia joven sira nune’e kompetitivu iha merkadu traballu,” Lobo rekomenda.
Entretantu, Timor-Leste rasik sei ofisializa nu’udár membru ASEAN ba da-XI iha loron 26 Outubru tinan ne’e hafoin iha tinan-2011 hato’o pedidu adezaun no iha tinan-2021 Timor-Leste sai nu’udár membru observadór.
Antes ne’e, ASEAN rasik iha membru permanente hamutuk nasaun sanulu (10) kompostu husi Kambódia, Indonézia, Laos,Vietname, Brunei Darussalam, Singapura, Myanmar, Filipina no Thailándia.
Jornalista: Natalino Belo
Editór: Xisto Freitas da Piedade
