KOVALIMA, 22 Outubru 2025 (TATOLI)-Autoridade Munisípiu Kovalima sei mobiliza populasaun hosi postu administrativu hitu hanesan Fohoren, Fatululik, Fatumea,Tilomar, Maukatar, Suai no Zumalai iha munisípiu Kovalima hodi selebra adezaun Timor-Leste ninia ba ASEAN iha loron 26 fulan-Outubru 2025.
Sekretáriu Komisaun Organizadóra Selebrasaun Adezaun Timor-Leste ba ASEAN, Alberto Moniz de Araújo, hateten komisaun organizadora sei lori populasaun kada postu administrativu ema na’in-150 kompostu hosi administradór postu, autoridade komunitária, konsellu suku, ofisiál suku no seluk tan hodi mai konsentra iha munisípiu atu selebra Timor-Leste ninia adezaun ba Organizasaun Sudeste Aziátiku ne’e.
“Selebrasaun adezaun Timor-leste ba ASEAN foin maka hala’o ba dahuluk nune’e ita sei mobiliza komunidade sira husi postu administrativu , suku no aldeia sira nune’e ami sei hala’o enkontru ikus atu fahe tarefa servisu ba seksaun sira,” nia hateten ba TATOLI, ohin.
Tuir planu durante selebrasaun ne’e sei iha mós atividade divertimentu liuhosi konsertu muzíka. Tanba ne’e, komisaun organizadora prodúz ona banér no prepara orsamentu atu aloka ba konsumu nian nune’e bele forñese hahán ba komunidade sira ne’ebé maka sei partisipa selebrasaun ne’e iha Kovalima.
Ekipa komisaun organizadora daudaun ne’e fahe ona ba kada seksaun hodi halo preparasaun no husi parte lojístika nian hahú distribui kaos ba komunidade sira baseia ba lista hosi Ministériu Administrasaun Estatál (MAE).
Ministériu Administrasaun Estatál aloka orsamentu USD 8.000 ba komisaun organizadora munisípiu Kovalima hodi selebra Timor-Leste ninia adezaun ba ASEAN.
Entertantu, selebrasaun ba Timor-Leste ninia adezaun ne’e sei hala’o iha Kampu Ladi Kovalima iha loron 26 fulan-Outubru 2025.
Kria kampu traballu ba joven-sira
Timor-Leste dadaun ne’e atu adera ona ba organizasaun Association of Southeast Asian Nations ASEAN, maibé Governu presiza kria kampu traballu ba joven-sira.
Xefe Suku Suai Loro Manuel da Costa, dehan razaun Governu presiza kria kampu traballu tanba Timor-Leste adere ba ASEAN presiza rekursu umanu, maibé realidade timor-oan sira buka kampu traballu iha rai-li’ur.
“ Ita hakarak Timor-Leste lalais adere ba ASEAN maibé mós ita presia haree ba rekursu umanu no rekursu narutál ita ko’alia de’it la tau iha prátika nune’e timor oan laiha mehi atu kria buat foun ruma iha ita-nia rai rasik”,Xefe Suku Suai Loro , Manuel da Costa, dehan ba TATOLI, iha Suai Loro.
Iha sorin seluk Xefe Suku Camnasa,Fernando Noronha, agradese Timor-Leste adere ba organizasaun ASEAN maibé presiza haree ba rekursu umanu,agrikultura nune’e redús importasaun foos husi rai liur
Jornalista:Celestina Teles
Editór:Florencio Miranda Ximenes
