DILI, 29 Outubru 2025 (TATOLI)—Ministériu Edukasaun (ME) liuhusi Institutu Nasionál Formasaun Dosente no Profisionál Edukasaun, fasilita formasaun inovativa ba profesór hamutuk 48.
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hateten objetivu hosi formasaun ne’e atu kapasita profesór sira husi Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) ho instrumentu modernu ligadu ho aprendizajen dijitál ne’ebé kriativu no interativu.
“Halo klase ne’ebé sai dinámiku no interativu atu estimula kriatividade no hanoin krítiku husi estudante sira mak prepara juventude atu enfrenta mundu dijitál ne’ebé iha interkonetadu,” Sekretáriu Estadu hateten ba jornalista sira iha Balide, Kuarta ne’e.
Govenante ne’e konsidera estudante no manorin sira mak hanesan protagonista boot ba transformasaun ne’e tanba teknolojia de’it labele muda edukasaun, maibé atu transforma liuhusi maneira ne’ebé iha.
“Ita iha ona planu ba tinan oin. Ita sei foti pilotu eskola rua, nune’e matrikulasaun ba to’o ezame ita sei uza sistema online,” Lopes dehan.
Iha fatin hanesan, Prezidente INFORDEPE, Domingos Martins informa formasaun referida bele implementa tanba ema hotu nia esforsu hodi eleva kapasidade manorin sira-nian hodi enfrenta transformasaun dijitál iha mundu edukasaun.
Lemos akresenta liuhosi formasaun ne’e atu hasa’e komprensaun manorin nian, hodi kombina no integra teknolojia dijitál iha prosesu aprendizajen inovativa.
Formasaun ne’e hala’o durante loron tolu (3) ne’ebé hahú ona iha horisehik no sei ramata iha Sesta semana ne’e. Partisipante sira sei aprende plataforma dijitál hanesan Zoom, Tablet, Canva, Google Chrome no seluk tan, nune’e bele dezeña prosesu aprendijazen aula dijitál no aplika modelu aprendizajen inovativa ba estudante sira.
“Ita hotu konxiente katak manorin mak liña frente ba mudansa iha área edukasaun liuliu iha sékulu XXI, tanba ne’e formasaun dijitál la’ós komponente de’it, maibé sai ona hanesan dijitál atu kria prosesu aprendizajen moderna,” Prezidente dehan.
Jornalista: Osória Marques
Editór: Xisto Freitas da Piedade
