DILI, 30 Outubru 2025 (TATOLI)—Ekipa Futeból Feto husi Asosiasaun Dili Leste sai vensedór terseiru lugár hafoin susesu manán Asosiasaun Futeból Baukau ho skor 2-1 iha Estádiu Munisipál Dili, Kinta ne’e.
Ekipa Dili Leste serteja ona hetan prémiu terseiru lugár iha-ne’ebé rezulta skor iha tabela hatudu 2-1.
Dili Leste lidera iha jogu parte dahuluk ho skor 1-0 liuhosi penalidade ne’ebé enxe husi jogadora Cecília iha minutu 19 no golu daruak prodús husi jogadora Desiana iha jogu parte daruak minutu 47.
Enkuantu, ekipa Asosiasaun Futeból Baukau konsege responde golu ida liuhosi jogadora Laura Pereira iha minutu 74 hodi muda tabela skor sai 2-1 maibé labele salva ekipa Kulugisa husi derrota kontra Dili Leste.
Notísia relevante: Ekipa feto husi Aileu garante sai kampiaun Kopa Juveníl Sub-17
Treinadór Asosiasaun Dili Leste, José Fernandito hato’o agradesimentu ba Federasaun Futeból Timor-Leste (FFTL) ne’ebé organiza ona kompetisaun entre munisípiu iha-ne’ebé liuhosi eventu ne’e konsege hetan jogadora pontensiál hodi reforsa ekipa futeból feminina iha Liga Futeból Femininu Timor-Leste (LFFTL).
“Jogadora sira-ne’e maioria estudante ne’ebé hala’o selesaun liuhosi kada eskola iha Dili no rezultadu ida-ne’e urgullu ba ami,” José Fernandito hateten iha Estádiu Munisipál Dili.
Ho rezultadu jogu ne’e, Dili Leste iha direitu ba prémiu orsamentu ho montante $1.250 inklui ho medalla. Enkuantu, Asosiasaun Futeból Baukau ne’ebé iha pozisaun dahaat komisaun husi Federasaun Futeból Timor-Leste prepara orsamentu rihun $1 ba sira inklui medalla.
Jornalista: Natalino Belo
Editór: Xisto Freitas da Piedade
