DILI, 14 Novembru 2025 (TATOLI)—Governu liuhusi Vise-Primeiru-Ministru, Ministru Koordenadór Asuntu Ekonómiku no Ministru Turismu Ambiente, Francisco Kalbuadi Lay, afirma kona-ba alokasaun Orsamentu Jerál Estadu (OJE) 2026 ba iha sub programa investimentu diversifikasaun ekonómika ne’ebé prevee millaun $5 hodi halo preparasaun estudu ba projetu kontrusaun sentru konvensaun internasionál ne’ebé sei harii iha Portu Dili.
Notísia Relevante: Governu lansa dezeñu ba projetu sentru konvensaun internasionál iha Portu Dili
“Orsamentu alokasaun millaun $5 ne’e ba preparasaun estudu, tanba antes ne’e mós ita lansa tiha ona dezeñu no momentu ne’ebá mós partisipa husi Governu Malázia no Timor-Leste nian. Ne’ebé, ita sei harii sentru kovensaun internasionál ida iha Timor,” Vise=Primeiru-Ministru, resposta ba pontu esklaresimentu husi bankada opozisaun iha debate OJE 2026 loron daruak iha faze espesiálidade iha PN, ohin.
Nune’e, nia dehan, fiar katak iha fulan-Janeiru ho apoiu tomak husi entidade oioin mak konstrusaun sentru konvensaun internasionne’e bele akontese duni, tanba Timor-Leste tama ona ba ASEAN iha rekezitu ne’ebé presiza kompleta mak infraestrutura.
“Entaun, ita mós tenke prepara ita-nia an liuliu ba iha fasilidade hodi halo sentru konvensaun internasionál,” nia dehan.
Jornalista : Alexandra da Costa
Editór : Cancio Ximenes
