DILI, 20 Novembru 2025 (TATOLI)-Ministériu Administrasaun Estatál (MAE) sei fó sai, iha fulan ne’e, rezultadu avaliasaun kondisaun mínima munisípiu sira-nian atu simu podér lokál.
“Avaliasaun kondisaun mínima ita halo tinan ida-ne’e. Antes Dezembru ita tenke públika ona. Munisípiu sira prienxe duni kritériu serbisu 19 ho serbisu autónomu {ualu}, liuliu mak planeamentu orsamentu ho fiskalizasaun orsamentu. Sira iha ona kapasidade ka la’e?’’, Ministru Administrasaun Estatál, Tomtás do Rosario Cabral, hato’o iha ámbitu debate Orsamentu Jerál Estadu (OJE) 2026 iha faze espesialidade, iha Parlamentu Nasiontál, ohin.
Nia hateten bainhira munisípiu ne’ebé seidauk prienxe kondisaun mak Governu sentrál, liuliu ministériu sira ne’ebé iha delegasaun iha obrigasaun atu fó asisténsia téknika.
Durante ne’e parte MAE no Ministériu Finansa (MF) rasik fó formasaun iha área relevante ba iha autoridade munisípiu sira. “Rezultadu liuhusi konsulta sidadania, iha ne’e obriga ami atu fó asisténsia téknika’’, dehan.
Hodi salienta katak iha auditória liubá iha rekomendasaun lubun atu munisípiu sira tau atensaun, tanba laiha baze dadus no manuál arkivu eletróniku presiza hadi’a. Nune’e ministériu fó asisténsia téknika mós ba postu administrativu sira iha informátika, nune’e sinkroniza dadus populasaun no portál munisipál.
Tuir relatóriu MF, ezekusaun orsamentu dezempeñu munisípiu sira atinje ona 70% ba leten, maibé tenke mellora nafatin.
Ministru hateten Governu sentrál fó kompeténsia ho fazeadamente no halo hela tranzisaun atu prepara kondisaun ba podér lokál.
Tuir planu, bainhira munisípiu sira ne’ebé prienxe kondisaun mínima maka iha tinan 2027 sei hakat ba eleisaun kámara munisipál.
Notísia relevante: https://tatoli.tl/2025/11/06/2026-nuudar-teste-ba-munisipiu-sira-hakat-ba-eleisaun-kamara-munisipal/
Jornalista: Nelson de Sousa
Editora: Maria Auxiliadora
