DILI, 25 Novembru 2025 (TATOLI)—Ministériu Petróleu no Rekursu Minerál no Woodside Energy Ltd (Woodside), ohin, asina akordu kooperasaun hodi halo estudu no dezenvolve konseitu Timor-Leste Liquified Natural Gas (TLNG) bazeia iha Timor-Leste.
Ministru Petróleu no Rekursu Minerál (MPRM), Francisco da Costa Monteiro, hateten akordu ne’e ho mensajen ida-ne’ebé klaru katak Governu Timor-Leste ho Woodside unidu iha sira-nia ambisaun atu prodús Greater Sunrise iha maneira ida-ne’ebé fó benefísiu ba parte interesada sira hotu.
“Projetu TLNG entrega benefísiu ekonómiku, sosiál no estratéjiku ne’ebé di’ak-liu ba povu Timor-Leste. Ami iha kompromisu atu servisu ho konstrutivu ho Woodside, emprendimentu Greater Sunrise no parte sira seluk atu avansa projetu ne’e no realiza ami-nia vizaun ba Greater Sunrise,” Francisco da Costa Monteiro hateten liuhusi diskursu iha serimónia asinatura akordu iha Hotel JL World, Metiaut, ohin.
Nia esplika, akordu ida-ne’e marka signifikativu ida iha Timor-Leste no Woodside nia esforsu ba tempu naruk, atu loke valór kampu gás Greater Sunrise nian no reflete espíritu kolaborasaun no kompromisu metin entre parte sira-ne’e.
Iha fatin hanesan, Reprezentantr Empreza CEO Woodside, Meg O’Neill, hateten nia parte ho laran-haksolok ba akordu ne’e atu reprezenta pasu sira ho nia relasaun no kompromisu fahe ba dezenvolvimentu kampu Greater Sunrise nian.
“Serbisu ida-ne’e hanesan estensaun ida husi estudu konseitu tinan kotuk nian no sei aborda konsiderasaun sira seluk ne’ebé nesesáriu hodi alkansa selesaun konseitu nian. Hanesan, konkorda kona-ba estrutura komersiál downstream ne’ebé apropriadu liu hodi atrai finansiamentu, komprende dalan preferidu ba pipeline esportasaun gás nian,” Meg O’Neill hateten.
Tuir Akordu, MPRM no Woodside sei hala’o atividade dezenvolvimentu komersiál no tékniku ba konseitu GNL greenfield ho baze iha Timor ho kapasidade maizumenus tonelada millaun lima (5) kada tinan, ekipadu ho instalasaun gás doméstika no fábrika.
Atividade hirak ne’e sei la’o paralelu ho negosiasaun ne’ebé la’o hela kona-ba enkuadramentu fiskál, regulatóriu no legál hodi fó apoiu ba dezenvolvimentu kampu Greater Sunrise entre Empreza Konjunta Sunrise, Governu Timor-Leste no Austrália.
Akordu ne’e inklui planu nivel aas ida-ne’ebé trasa atividade xave sira-ne’ebé presiza atu sai maduru no dezenvolve oportunidade ida-ne’e, ho produsaun LNG dahuluk ne’ebé posivel iha inísiu 2032-2035, depende ba selesaun konseitu no desizaun investimentu sira.
Iha serimónia asinatura akordu ne’e, partisipa husi Primeiru-Ministru, Xanana Gusmão, Ministru MPRM Francisco da Costa Monteiro, Vise-Diretora Ezekutiva Woodside Energy nian ba Dezenvolvimentu Tékniku no Enerjétiku, Julie Fallon, no seluk tan.
Jornalista : Felicidade Ximenes
Editór : Cancio Ximenes
