DILI, 12 Dezembru 2025 (TATOLI)—Diretór Ezekutivu Servisu Rejistrasaun no Verifikasaun Emprezariál, Institutu Públiku (SERVE, I.P), Fausto Dias, informa hahú husi 2013 to’o 2025 ne’e SERVE rejista totál operadór ekonómiku ne’ebé la ativu ona sira-nia atividade komersiál hamutuk 986.
Diretór Ezekutivu SERVE, I.P, Fausto Dias, relata operadór ekonómiku hirak ne’e kompostu husi tipu komersiál neen (6) hanesan Individuál Enterprise (ENIN) hamutuk 80, Unip Lda na’in 609, LDA (Limitada) hamutuk 184, S.A (Sosiedade Anonimu) na’in 11, R.P (Reprezentasaun Permanente) hamutuk 102 no Empreza Públika 0 ka seidauk taka.
“Razaun husi operadór ekonómiku sira taka ne’e la’ós komete irregularidade ruma, maibé depende ba sira-nia nesesidade ne’ebé sira enfrenta, entaun fila fali ba empreza ida-idak. Maibé bainhira sira atu taka tenke ba halo asesmentu uluk iha Ministrériu Finansa liuhusi Autoridade Atributária hodi haree sira-nia divida pagamentu, hafoin mai fali iha SERVE hodi taka sira-nia emprezariál,” Dirijente ne’e esplika ba Agência Tatoli, ohin.
Nia hatutan, aleinde empreza balun mak taka ona maibé balun sei nafatin ativu hahú husi 2013 to’o 2025 ne’e hamutuk 682.298, kompostu husi Individuál Enterprise (ENIN) hamutuk 33.072, Unip Lda na’in 27.704, LDA (Limitada) hamutuk 7.842, S.A (Sosiedade Anonimu) na’in 121, R.P (Reprezentasaun Permanente) hamutuk 550 no Empreza Públika hamutuk 9.
“Operadór ekonómiku sira-ne’e la’ós husi de’it timoroan maibé kompostu mós husi estranjeiru tanba ne’e ami mós rejistu orijinál kapitál husi estranjeiru hamutuk 5.610, lokál (timoroan) hamutuk 26.517, joing ka kahur entre timoroan ho estranjeiru hamutuk 774 no la espesífiku hanesan ONG, fundasaun no kooperativa ne’e totál hamutuk 38.733,” nia relata.
Aleinde ne’e, nia mós informa kona-ba reseita ne’ebé sira rekolla ba kofre Estadu hamutuk $478.669.10 ne’e husi fulan-Janeiru to’o Novembru, enkauntu fulan-Dezembru nian seidauk tanba hein taka trimestrál ikus foin kalkula hotu no reseita sira-ne’e rekolla husi munisípiu 11, enkuantu RAEOA nian sira rasik mak rekolla no Ataúru seidauk iha sukursál SERVE nian.
Jornalista : Alexandra da Costa
Editór : Cancio Ximenes
