OEKUSI, 15 Dezembru 2025 (TATOLI) – Sekretáriu Estadu Protesaun Sívil (SEPS), Domingos Mariano dos Reis, segunda ohin, entrega ekipamentu informátiku hanesan komputadór, mákina impresora, kamera ida no mós mobiliáriu sira hanesan meja no kadeira ba Autoridade Protesaun Sívil (APC) Rejiaun Administrativa Espesiál Oekusi Ambeno (RAEOA) hodi haforsa prestasaun serbisu administrasaun nian.
Governante ne’e afirma, ekipamentu sira-ne’e, nesesáriu atu garantia administrasaun, apoia sira-nia serbisu iha instituisaun APEC Oekusi.
“Durante ne’e sira laiha komputadór, printer (impresora), meja no kadeira, entaun saida mak ohin ita apoia ba sira hodi garante sustentabilidade ba instituisaun ida-ne’e, entaun ohin ita entrega komputadór unidade tolu kompleta kedas ho printer, meja, kadeira unidade haat, armáriu ida hodi apoia rai arkivu inklui kamera ida, bainhira akontese dezastre ruma karik sira-bele halo dokumentasaun,” nia hateten iha hafoin entrega iha edifísiu APC Oekusi, ohin.
Notísia relevante:OIM no APC Oé-Cusse halo simulasaun hodi responde ba dezastre naturál
Iha biban ne’e, Komandante Operasaun APC Oekusi, João Sila, orgullu tanba ho fasilidade hirak-ne’e, sufisiente atu fasilita di’ak liután serbisu APC Oekusi.
“Liuhusi apoia sasán sira-ne’e, ita bele haforsa tan serbisu APC Oekusi nian ne’ebé fasilidade sira ne’e sufisiente ba ami tanba buat hotu la’o ho planu orsamentu, ne’ebé ami sente orgullu tanba ida-ne’e faz parte apoia serbisu APC relasaun ho serbisu administrasaun no dokumentasaun nian,” nia orgullu.
Entretantu, totál funsionáriu ne’ebé eziste iha APC Oekusi inklui bombeiru sira hamutuk na’in-44.
Jornalista: Abílio Elo Nini
Editór: Rafael Ximenes de A. Belo
