OEKUSI, 10 Jullu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), prevee orsamentu rihun $59,012.00 ba servisu limpeza no fornesimentu materiál ba Serbisu Rejionál Administrasaun no administrasaun sira iha sub-rejiaun haat, Oésilo, Pássabe, Nítibe no sub-rejiaun Pante Makasar.
“Aprovizionamentu públika ona kompañia manán-na’in, ne’ebé iha tempu-badak Autoridade sei selebra kontratu atu bele hala’o nia serbisu limpeza iha postu administrativa sira, sistema sei hanesan, tanba antes ne’e nia mak manán, hanesan limpeza iha diresaun sira, ne’ebé nia sistema sei la’o hanesan antes ne’e, no nia orsamentu prevee kedas, hein de’it selebrasaun kontratu definitivu ho Autoridade RAEOA sei realiza iha tempu-badak,” Sekretáriu Rejionál ba Asuntu Administrasaun no Finansa, Salvador da Cruz hateten, iha Oekusi, ohin.
Notísia relevante:Autoridade RAEOA aloka rihun $53 halo limpeza iha edifísiu sub-rejiaun haat
Observasaun Jornalista Ajénsia Tatoli,I.P, nota katak antes ne’e, iha kompañia lokál tolu mak konkorre iha projetu aprovizionamentu ho Númerú RQF:012/SRAp/RAEOA TL/V/2026 iha númeru haat, hateten Iha estimativa katak folin kontratuál anuál labele liu $38.193.00, prosedimentu provizóriu tenke iha valór tuirmai, $38,193.00 ba fulan hitu de’it, hahú husi Juñu to’o de’it Dezembru 2026.
Aprovizionamentu RAEOA husu ba kompañia sira atu hala’o serbisu limpeza ho durasaun fulan hitu (7) de’it ho montante $38,193.00, maibé kompañia Nelces aprezenta fali presu rihun $55,462.50 ba tinan ida kedas hanesan mós ho kompañia Nabilan Unipesoál aprezenta presu ba tinan ida nian hotu ho montante rihun $64,233.60.
“Só úniku kompañia Pen Seka Unipesoál Lda de’it maka aprezenta presu ba fulan hitu duni ho montante rihun $37,667.00,”
Nune’e, iha loron segunda, 25 Maiu 2026, iha oras tuku 2:15 lorokraik, parte aprovizionamentu RAEOA halo abertura ba kompañia sira-ne’ebé halo submisaun dokumentu finál iha kompañia tolu maka hanesan;
- Kompañia Nelces Unipesoál Lda, ne’ebé aprezenta presu rihun $55,462.50 ba tinan ida nian, maske BoQ ne’e husu atu aprezenta presu ba fulan hitu nian de’it.
- Kompañia Nabilan Unipesoál Lda, aprezenta presu rihun $64,233.60, no iha mumentu ne’e kompañia referida la liu ona iha faze ida-ne’e, tanba la hatama ka laiha file moris BoQ iha USB.
- Só úniku kompañia Pen Seka Unipesoál Lda, maka prienxe duni regra aprovizionamentu ho dokumentu kompletu tanba aprezenta presu durante fulan hitu ho montante rihun $37,667.00
Notísia relevante:Fornesimentu materiál ba notariadu Oekusi sei gasta rihun $206-resin
Jornalista: Abílio Elo Nini
Editór: Rafael Ximenes de A. Belo
