DILI, 17 Dezembru 2025 (TATOLI) – Vogál II iha Autoridade Portuária Timor-Leste, Instutu Públiku (APORTIL, I.P), Leandro de Sena, informa ró-ahi Berlin Ramelau sei bá halo manutensaun iha Surabaya-Indonézia, durante fulan rua.
Nia esplika katak manutensaun ne’e tenke halo, tanba kritériu ne’ebé iha kada tinan halo manutensaun, nune’e APORTIL prevene orsamentu hamutuk $553.432,93.
“Ami planu ró-ahi sai husi Timor-Leste ohin lokraik ne’e, lae aban dadersán, no durante manutensaun presiza loron 60”, Leandro de Sena dehan ba Tatoli, ohin.
Nia salienta katak durante halo manutensaun iha Surabaya ró Success mak sei substitui hodi halo viajen entre Dili no Oekusi.
Lembra katak, antes ne’e, APORTIL halo uluk ona manutensaun ba ró Berlin Nakroma iha Outubru 2024 no fila hikas mai Dili iha Marsu 2025.
Notisía relevante: Berlin Ramelau sei bá halo manutensaun
Jornalista: Arminda Fonseca
Editora: Maria Auxiliadora
