DILI, 19 Dezembru 2025 (TATOLI)—Asosiasaun Futeból Femininu Timor-Leste (AFFTL) liuhusi komisaun organizadora hahú loke janela transferénsia ba klube sira-ne’ebé kompete iha primeira divizaun Liga Futeból Femininu Timor-Leste (LFFTL).
Janela transferénsia ba LFFTL ofisialmente loke hahú iha loron 19 Dezembru 2025 no taka iha 04 Janeiru 2026.
“Iha durasaun períodu ne’e, klube partisipante hotu iha oportunidade atu halo prosesu transferénsia, rejistu no atualizasaun jogadora sira, tuir regulamentu no prosedimentu ne’ebé mak aplika,” hakerek nota imprensa husi komisaun organizadora primeira divizaun LFFTL ne’ebé TATOLI asesu, Sesta (19/12/2025).
Komisaun organizadora konsidera janela transferénsia ne’e importante hodi fó oportunidade ba klube hotu atu hametin ekipa, hadi’a estrutura téknika, no fó espasu ba jogadora sira atu hetan oportunidade foun iha nivel kompetisaun nasionál.
AFFTL hein katak klube hotu bele respeitu kalendáriu, regulamentu no prazu ne’ebé mak determina ona nune’e bele garante prosesu transferénsia ne’ebé transparente, ordenadu no profisiónal.
Entretantu, klube sanulu mak kompete iha primeira divizaun LFFTL hanesan Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC, Maudoko FC, VDL no Na’in-Feto.
Jornalista: Natalino Belo
Editór: Xisto Freitas da Piedade
