OEKUSI, 22 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, promete sei laiha nesesáriu atu kontinua selebra kontratu serbisu ho funsionáriu na’in-29 ne’ebé hala’o serbisu iha Zona Espesiál Ekonomia Dezenvolvimentu Oekusi Ambeno (ZEEDOA).
Notísia relevante:“Funsionáriu deznesesáriu, la presiza atu kontinua”
Régio Salu fó sai nia deklarasaun ofisiál ne’e, bainhira hala’o introdusaun ba konseitu programa “Movimentu Empreendedorizmu Oekusi” ba grupu agrikultura no emprezáriu lokál sira iha salaun alfándega Oekusi ho tema ‘reorganiza-an no la’o hamutuk dezenvolve ekonomia merkadu Oekusi ne’ebé reziliente’.
“Programa Movimentu Empreendedorizmu Oekusi ne’e, ZEEDOA mak sei lidera, maibé ohin Koordenadór ZEEDOA la mai, nia ema funsionáriu sira mós la mai, nia staff hot-hotu laiha ne’e, ha’u deklara kedas iha fatin ne’e, ha’u sei fó karta ida ba sira, sei la kontinua kontratu atu serbisu iha 2026. Como Koordenadór ZEEDOA mai ho rezolusaun laiha buat ida, maibé staff hot-hotu ha’u mak asina kontratu sei la kontinua, sura ha’u-nia liman, tasi la sa’e, ita hakarak ko’alia ba povu, ita laiha buat ida, ita tau de’it iha ne’e rai no povu, Maun-Bo’ot hamenu buat ne’e,” Régio Salu insiste iha salaun alfándega Oekusi.
Notísia relevante:PM Xanana husu Autoridade RAEOA-ZEEDOA promove koordenasaun serbisu iha administrasaun públika
Autoridade másimu RAEOA ne’e afirma, funsionáriu sira-ne’eb’e des-nesesáriu presiza redús, nune’e bele foku prestasaun serbisu ba povu no rai-ketan Oekusi nia di’ak.
“Dala ida tan, staff ZEEDOA hot-hotu laiha ne’e, programa ne’e sira mak sei lidera, no sira mak sei koordena, na’in-ida laiha iha ne’e, konvite hetan la mai, entaun sira hotu sei la kontinua serbisu, bele kapta ha’u-nia naran no ha’u-nia liafuan, di’akliu ema uitoan maibé serbisu ba povu duke ema barak la halo buat ida, hanoin fali katak ita ne’e atu hadau serbisu,” nia afirma.
Notísia relevante:PM Xanana atribui prioridade neen ba PA RAEOA ezekuta durante fulan tolu
Jornalista Ajénsia Tatoli,I.P, tenta konfirma asuntu ne’e ho Koordenadór ZEEDOA, Herculano de Souza, maibé laiha fatin tanba daudaun ne’e hala’o hela serbisu iha nasionál Dili.
Entretantu, kriasaun ZEEDOA iha ligasaun ho Lei n.º 3/2014, de 18 de junho. Iha tinan-2023, Parlamentu Nasionál aprova alterasaun no estatutu legál sira ne’ebé reforsa enkuadramentu ne’e, hodi konsolida baze legál ZEEDOA nian.
Jornalista: Abílio Elo Nini
Editór: Rafael Ximenes de A. Belo
