DILI, 23 Dezembru 2025 (TATOLI)—Komisaun Rekrutamentu ba membru Polísia Nasionál Timor-Leste (PNTL) foun sei fó sai rezultadu finál iha Janeiru 2026.
“Sim, Janeiru ita bele fó sai ona, tanba hein anula de’it valór sira ne’e,” Portavós Komisaun Rekrutamentu ba membru foun PNTL, Superintendente Polísia António da Luz, informa ba Ajensia TATOLI bainhira partisipa retiru ne’ebé organiza husi Ministeriu Interiór, ne’ebé hala’o iha Sentru Formasaun Polísia, Komoro, Tersa ne’e.
Daudaun besik konklui ona, ne’ebé valór sira akumuladu husi teste kulturál, psikotes fíziku no entrevista.
“Teste husi munisípiu balun tama ona, hein de’it munisípiu ikus mak Vikeke no Oekusi. Agora Vikeke hotu ona hela de’it Oekusi no dia 30 ita konklui teste sira ne’e hotu mak ita foin soma hamutuk teste kulturál, teste fiziku, psikotes no entrevista haat tau hamutuk mak foin soma hamutuk mak aprezenta ba juri hodi deside,” nia akresenta.
Notísia relevante : Sekretariadu Rekrutamentu rejista aplikante 13.772 konkorre ba vaga PNTL
Komandante Da Luz esplika, valór hotu tau hamutuk hafoin fahe fali ba haat, ne’ebé kandidatu ida tenke to’o valór másimu 60.
“Kuandu menus husi 60 ka nia iha valór 59 de’it mós la pasa ka admitidu,” nia tenik.
Komisaun Rekrutamentu la rejista reklamasaun ruma husi kadetis durante teste kulturál to’o entrevista.
” To’o agora ami seidauk rejista reklamasaun ruma. Buat hotu la’o di’ak,” nia katak.
Jornalista : Natalino Costa
Editora : Julia Chatarina
