DILI, 08 Janeiru 2026 (TATOLI)—Diretór Ezekutivu Banco do Nosso Futuro (BNF), Fausto Bernardino informa BNF prodús ona ATM hamutuk rihun lima (5.000) ba kombatente libertasaun nasionál.
“Maluk veteranu ne’ebé asesu ba BNF, hahú hosi 15 Dezembru to’o ohin loron, 5.000-resin. Aleinde ne’e, ema 5.000 mak iha prosesu ba asesu kartaun ATM hodi bele foti sira-nia osan,” nia dehan ba jornalista sira iha nia kna’ar fatin, Komoro, Kinta ne’e.
Aleinde ne’e, nia dehan, kliente ne’ebé rejistu iha Banco do Nosso Futuro hamutuk 17.000 ona.
Nia esplika BNF ne’e nakloke ba ema hotu, la’ós ba kombatente libertasaun nasionál de’it, tanba BNF ne’e banku komersiál.
“Banco do Nosso Futuro la’ós ba kombatente de’it tanba ita komersiál ne’ebé ho tipu akomoda parte hotu. Banco do Nosso Futuro ne’ebé hetan lisensa hosi Banku Sentrál ne’e ho folin komersiál,” Fausto tenik.
Nia hatutan, aleinde iha Dili, BNF mós hahú opera ona iha munisípiu sira, daudaun ne’e iha ona faze prosesu nia laran atu emite kartaun débitu (debit card) ne’ebé sei fasilita kombatente inklui ema seluk.
Diretór ne’e esplika katak kartaun ATM BNF bele fasilita kualker sé mak mai iha banku ne’e no uza kartaun ne’e bele uza iha banku hotu iha territóriu.
Nia dehan kartaun ATM ne’ebé Banco do Nosso Futuro halo ne’e P24 entaun la’ós ba mákina BNF de’it maibé kualker mákina ne’ebé ho marka P24, pur-e-emplu BNU, Mandiri, BNCTL, BRI.
Fausto Bernardino hatutan ligadu ko’a osan ba administrasaun ne’e BNF ko’a kada fulan $0,50. La’ós de’it BNF mak halo maibé banku komersiál ne’ebé eziste iha Timor-Leste aplika hotu. No osan kuandu tama ne’e labele foti hotu maibé mantein nia konta iha mínimu $10-$15.
Totál fundu kontributivu kombatente dezde tinan 2020 to’o 2025, to’o ona millaun $62 hosi benefisiáriu 27.629. Ida-ne’e bazeia ba Dekretu-Lei Númeru 13/2022 ne’ebé fó dalan hodi ko’a osan.
Banco do Nosso Futuro ne’e inauguradu iha 04 Setembru 2025. Banku ne’e 100% nia investimentu hosi Timor-Leste, ne’ebé suporta hosi fundu kombatente libertasaun nasionál nian.
Objetivu hosi estabelesimentu Banco do Nosso Futuro ne’e atu suporta inkluzaun finanseira, dezenvolvimentu ekonómiku no fornese servisu ba veteranu sira no sidadaun Timor-Leste tomak.
Entretantu, Prezidente José Ramos-Horta sai hanesan kliente dahuluk ba Banco do Nosso Futuro.
Jornalista: Osória Marques
Editór: Xisto Freitas da Piedade
