DILI, 08 Janeiru 2026 (TATOLI)-Primeiru-Ministru, Kay Rala Xanana Gusmão hala’o enkontru dahuluk iha tinan 2026 ho Prezidente Repúblika, José Ramos Horta, hodi relata kona-ba situasaun sosiál ne’ebé akontese iha rai-laran iha ámbitu selebrasaun Natál (25 Dezembru 2025) no Tinan Foun (01 Janeiru 2026).
Xefe Governu ne’e hatutan, Xefe Estadu husu ba joven sira iha Timor-Leste atue hamutuk harii dame iha Timot-Leste no labele tan kria problema hanesan joven sira halo problema iha Ainaru no fatin seluk tan.
“Prezidente Repúblika mós agradese ba joven sira iha fatin hotu-hotu no dispozisaun hotu-hotu nian atu harii nafatin dame iha ita-nia rain,” Xefe Governu ne’e hateten ba jornalista sira iha Palásiu Prezidensiál Nicolau Lobato, Bairru Pite, ohin.
Primeiru-Ministru informa ba Prezidente Repúblika kona-ba situasaun iha Timor agora hakmatek, maske iha problema ruma ne’ebé akontese iha área izoladu hanesan akontese iha Ainaru ne’ebé rezulta membru seguransa balun hetan kanek.
“Signifika problema ne’e izoladu tamba la’ós beibeik maibé tamba tuir tempu. Bainhira ema konsumu alkol no tuur hamutuk diskute malu hodi provoka situasaun hamosu problema,” nia dehan.
Antes ne’e, Kinta (01 Janeiru 2026), Komandante Polísia Nasionál Timor-Leste (PNTL) Eskuadra Postu Uatulari, Inspetór Polísia Francisco Fernandes Menezes, informa iha ámbitu simu tinan foun 2026, akontese konfrontu entre joven Aldeia Tatilari no Aldeia Uatulo husi Suku Matahoi, Postu Administrativu Uatulari, Munisípiu Vikeke, iha-ne’ebé PNTL Uatulari konsege kaptura suspeitu hamutuk na’in-14 hodi submente ba prosesu invetigasaun.
Komandante PNTL Eskuadra Uatulari ne’e haktuir kronolojia ba konfrontu ne’e mak joven sira konsume alkol, sunu fogete no kondús motorizada halo barullu.
“Husi parte rua ne’e hemu tua lanu hotu depoiz sunu fogete se fali ba malu, depoiz kaer fatuk lori tuda malu tan. Entaun, Polísia Eskuadra Uatulari ba atua ho karreta patrullamentu. Suspeitu sira husi parte Tatilari nian tuda lisuk fali karreta polísia nian ne’ebé vidru odamatan kotuk parte husi liman-loos nian rahun no membru polísia na’in haat (4) mak hetan tuda no sai kanek,” nia relata.
Nune’e, nia dehan, konfrontu referidu afeta mós komunidade nia uma rua ninia kalén kuak no sasán uma laran hanesan armáriu no vidru rahun hotu. Kazu konfrontu ne’e rejistadu ho tipu ofensa simples no danu.
Kazu ne’e, Francisco informa, suspeitu husi Aldeia Tatilari na’in-hitu (7) no suspeitu husi Aldeia Uatulo na’in-hitu (7) ne’ebé daudaun ne’e iha ona Komandu PNTL Vikeke.
Aleinde ne’e, Sesta (02 Janeiru 2026), Inspetór Polísia Komandante Eskuadra Balibo, Ernesto Martins, informa Polísia Nasionál Timor-Leste (PNTL) eskuandra Balibo kaptura joven na’in-hitu (7) ho inisia M, A, A, E, E, J, K, ne’ebé komete konflitu komunitária iha Suku Balibo, Postu Administrativu Balibo, Munisípiu Bobonaru.
Akontesementu ne’e akontese bainhira grupu juventude sira husi parte villa nian halo atake ba joven sira husi bairu Berame iha fatin públiku iha bairru merkadu villa nian, hafoin sira fila husi tasi Palaka ba uma.
“Situasaun sira-ne’e akontese tanba suspeitu sira konsumu alkol domina ona, nune’e la kontroladu hodi halo asaltu asaun fízika ba lezada, hadau xave motor, provoka malu hodi hamosu tuda malu ho fatuk ba lezada sira. Ida-ne’e la’ós kestaun arte marsiál ruma ka ódiu individu. Tanba durante ne’e, tuir ha’u-nia haree, joven sira iha ne’e unidade tebes tanba ligasaun família. Karik sira konsumu ona alkol foin buka problema ba malu, entaun kauza loloos iha prosesu investigasaun foin bele deteta loloos,” Inspetór Polísia Komandante Eskuadra Balibo, Ernesto Martins, informa ba Agência Tatoli iha nia kna’ar fatin, Balibo.
Komandante ne’e dehan, iha komandu nia desizaun katak labele abitua ho asaun sira-ne’ebé joven sira halo maibé tenke loke prosesu investigasaun ne’ebé profundu hodi hetan informasaun adekuadu antes submete ba MP, atu halo prosesu kontinuasaun katak sé mak loos no sé mak sala, PNTL fasilita de’it seguransa no investigasaun.
Jornalista : Alexandra da Costa
Editór : Cancio Ximenes
