DILI, 14 Janeiru 2025 (TATOLI)-Komisaun D ne’ebé trata Asuntu Ekonomia no Dezenvolvimentu iha Parlamentu Nasionál hahú audiénsia públika kona-ba proposta Lei númeru 21/VI (2a)-Lei Pestisida.
Entidade ne’ebé partisipa iha audiénsia ne’e mak husi Ministériu Agrikultura, Pekuária, Peska no Floresta (MAPPF) no Universidade Nasionál Timor Lorosa’e (UNTL), liuliu Fakuldade Agrikultura.
Prezidente Komisaun D, Ricardo Baptista, hateten depoizde rona hanoin husi entidade sira mak komisaun hato’o ninia relatóriu no pareser apresiasaun inisiál ba iha diskusaun jeneralidade no kontinua ba espesialidade hodi bele prodús lejislasaun ida kualidade. “Ohin audiénsia no sei kontinua ho entidade relevante sira seluk”, hateten.
Iha fatin hanesan, Ministru Agrikultura, Pekuária, Peska no Floresta, Marcos da Cruz, ne’ebé aprezenta proposta ne’e hato’o katak inisiativa husi lejislativa ne’e ho razaun hakarak atu dezenvolve setór agrikultura husi sistema ida subsisténsia hodi halo modernizasaun no aumenta produsaun iha rai-laran, maibé presiza komponente barak inklui pestisida.
Notísia relevante: https://tatoli.tl/2026/01/07/komisaun-d-halo-audiensia-ba-proposta-lei-pestisida-iha-semana-oin/
“Kontrola kona-ba pestesida, tau tuir nia kuantidade no tempu, tipu ne’ebé iha, nune’e iha lei atu kontrola tanbáaema barak uza hodi prevene peste karakól no mós moras sira seluk tan, nune’e labele fó efeitu negativu ba ema, planta, animál, ambiente inklui rai”, dehan.
Bainhira lei ne’e aprova mak MAPPF sei prepara dekretu-lei hodi implementa lei ne’e.
Notísia relevante: Komisaun D halo audiénsia ba proposta Lei Pestisida iha semana oin
Jornalista: Nelson de Sousa
Editora: Maria Auxiliadora
