DILI, 21 Janeiru 2026 (TATOLI)—Autoridade Inspesaun Fiskalizasaun Atividade Ekonómika Sanitária Alimentár (AIFAESA, sigla portugés) kontinua halo inspesaun ba operadór ekonómiku ho kategória komérsiu, turístiku no indústria iha área Postu Administrativu Kristu Rei, Muníspiu Dili.
Sub-Inspetóra Jerál, Quitéria da Costa, hateten ohin loron ekipa AIFAESA tun hotu hodi halo inspesaun iha Dili laran tuir programa primeiru trimestre 2026 nian.
“Ami halo inspesaun ne’e hahú iha loron horisehik no ami identifika sasán ba aihan barak mak nafatin liu prazu no estragadu. Ne’eduni, ami fó tiha ona konvokatóriu atu operadór ekonómiku sira bele ba hatán iha AIFAESA,” Sub-inspetora ne’e informa ba jornalista sira iha Bekora, ohin.
Nia informa, sansaun ne’ebé AIFAESA fó ba operadór ekonómiku sira-ne’ebé komete infrasaun ne’e, baibain sira sempre selu koima ba Estadu tuir ninia gravidade.
“Tanba ne’e, ami nafatin disemina informasaun ba sira atu sasán sira-ne’ebé estragadu ona presiza haree no soe atu garante nafatin ijiéne ba konsumidór sira. Entaun iha programa trimestre dahuluk ne’e, ami sei halo de’it iha Dili laran liuliu sei kobre ba postu lima ne’e hotu kedas no ba trimestre daruak sei mellora ba munisípiu sira,” nia hateten.
Iha biban ne’e, Operadór Ekonómiku Restaurante Fezocelti, Ozório da Silva, hateten nia parte prontu koopera ho rekomendasaun ne’ebé mak AIFAESA relata ona ba sira, nune’e nia sei hadi’a ekipamentus tein nia tuir nia fatin hodi garante ijiéne no konfortabilidade ba konsumidór sira.
“Maibé sira haruka atu loke tan espasu fatin ne’e ba kotuk, ha’u hanoin ne’e susar karik tanba fatin ne’e ami aluga de’it, no atu loke tan espasu ba kotuk fatin laiha ona,” nia dehan.
Nia dehana, kona-ba ijiéne ne’e nia parte sempre garante, maske kondisaun iha Bekora rai-rahun su’ar maibé ninia traballadór sira sempre rega hela de’it.
Entretantu, kategória tolu ne’ebé AIFAESA halo inspesaun hanesan komérsiu foka liu ba loja faan hahan no bakery, iha fali kategória indústria sei haree liu ba fábrika ka produsaun bebidas no hahan enkuantu iha kategória turístika sei foka liu ba restaurante.
Jornalista : Alexandra da Costa
Editór : Cancio Ximenes
