VIKEKE, 23 Janeiru 2026 (TATOLI)–Xefe Suku Bahatata, Postu Administrativu Uatukarbau, Munisípiu Vikeke, Patrício Maria Pinto informa fasilidade bee-moos kanu distribuisaun no tanke daudaun ne’e aat nune’e populasaun Suku Bahatata uma-kain 71 enfrenta difikuldade ba bee-moos.
“Iha ami-nia Suku Bahatata aldeia rua ho totál uma-kain hamutuk 71 mak daudaun ne’e asesu bee-moos ladún di’ak tanba kanu distribuisaun bee-moos no tanke rezervatór aat, nune’e sira asesu bee-moos, maibé ladún efetivu. Dalaruma loron ida hetan ka liu loron rua to’o tolu mak foin asesu fali,” Patrício Maria Pinto dehan ba TATOLI, Postu Uatukarbau, Sesta ne’e.
Xefe Suku Bahatata ne’e hatutan, loloos ne’e populasaun husi aldeia rua ne’e asesu hotu ona bee-moos, maibé kanu distribuisaun no tanke ladi’ak, entaun difikulta distribuisaun bee-moos ba populasaun sira husi aldeia rua.
“To’o agora ami seidauk bele hadi’a kanu distribuisaun sira-ne’ebé aat, tanba iha tinan ida-ne’e Programa Nasionál Dezenvolvimentu Suku (PNDS) aloka fali hodi reabilita kapela. Nune’e, agora ami esforsu buka dalan ba parte relevante sira atu apoia ami. Karik tinan ida-ne’e ami la hetan, ami sei tau ba PNDS iha tinan 2027 hadi’a kanu no tanke sira-ne’ebé aat,” nia akresenta.
Nia dehan kona-ba fasilidade sira-ne’ebé aat ne’e hato’o ona ba Servisu Água no Saneamentu, maibé sira mós laiha fundu hodi hadi’a kanu no tanke rezervatóriu.
“Nune’e, ha’u planeia iha tempu badak halo pedidu ba parte Bee Timor-Leste, Empreza Públiku (BTL, E.P.), karik sira iha posibilidade ruma bele ajuda ami hodi hadi’a kanu no tanke rezervatóriu, atu ami-nia populasaun bele asesu ba bee-moos,” nia subliña.
Totál populasaun Suku Bahatata hamutuk na’in-590 mak asesu ona bee-moos, ne’ebé nia orsamentu maihosi PNDS iha 2023 nian.
Enkuantu, populasaun husi aldeia rua hanesan Builakurae no Aldeia Tatadere hamutuk 400 no uma-kain-71, ne’ebé ladún asesu ba bee-moos.
Jornalista: Vitorino Lopes da Costa
Editór: Xisto Freistas da Piedade
