DILI, 23 Janeiru 2026 (TATOLI)-Ministra Finansa, Santina Cardoso, relata kona-ba kanselamentu Projetu Kompaktu Millennium Challange Coorporation (MCC) ba Parlamentu Nasionál.
Governante ne’e dehan iha akordu ne’ebé Governu Timor-Leste asina ho MCC hodi loke mós edifísiu reprezentasaun Millennium Challange Account Timor-Leste (MCA-TL) ba projetu bee-moos no tratamentu bee fo’er nian iha grand pur volta millaun $429 no, tuir akordu ne’ebé iha , Governu Timor-Leste iha kontrapartida pur volta millaun $60.
Iha 2024, Timor-Leste atu tau orsamentu ba kontribuisaun millaun $11 no iha 2025 millaun $5, maibé ho desizaun husi Governu Estadu Unidu Amérika (EUA) hodi revee apoiu sira ba nasaun hotu, inklui Timor-Leste maka iha fin Dezembru tinan kotuk mak hetan konfirmasaun katak projetu MCC sei la kontinua.
Tan ne’e, orsamentu millaun $11 ne’ebé tau iha MCC iha relatóriu Kámara Konta ba Konta Jerál Estadu identifika laiha ezekusaun.
Ministra salienta katak daudaun Minitériu Finansa (MF) ho Ministériu Obra Públika (MOP), liuhusi Bee Timor-Leste, Empreza Públika (BTL, E.P) haree hela planu, dezeñu no patrimóniu sira ne’ebé iha ona atu bele entrega fali ba Governu Timor-Leste, nune’e orsamentu alokadu sei la book.
Durante audiénsia, Prezidente Parlamentu Nasionál, Maria Fernanda Lay, husu atu halo esklaresimentu ba kestaun referida.
Deputadu husi Partidu Demokrátiku, Mariano Malik, subliña prosesu ne’e iha implementasaun halo ona gastu liuhusi levantamentu dadus ba terrenu hodi fó ona indemnizasaun ba iha komunidade afeta ba área ne’ebé atu implementa programa ne’e.
“Governu halo ona gastu lubun, husu Minstériu Finansa atu ko’alia ho Governu Amérika oinsá fó kontinuisaun ba programa ne’e’’, nia sujere.
Notísia relevante: https://tatoli.tl/2026/01/13/btl-simu-dokumentu–kona-ba-kanselamentu-projetu-kompaktu-mcc-husi-mca-tl/
Jornalista: Nelson de Sousa
Editora: Maria Auxiliadora
