DILI, 30 Janeiru 2026 (TATOLI) – Anin-boot ne’ebé akontese horisehik pur volta tuku 15h00 halo monu tiha planfon Ministériu Finansa nian iha parte varanda nian monu.
“Horiseik ami iha reuniaun boot ida iha ne’e, ho tempu hanesan anin-boot rezulta planfon ne’e monu, iha lobby nian, maibé la rezulta ema kanek ka mate, lampu lobby nian ne’e mak aat”, Diretór Nasionál Lojistika Manutensaun no Jestaun Projetu iha Ministériu Finansa, Domingos Marques, hateten, ohin.
Nia haktuir katak hafoin akontesimentu ne’e ministériu kontaktu kedas ba empreza no daudaun tékniku sira iha ne’e hela para hadi’a.
“Horiseik planfon monu, sira iha ne’e hasai ida ne’ebé monu ne’e. Agora sira labele hadi’a lai tanba anin sei boot ne’ebé bainhira anin para mak kompañia hadi’a tanba sira daudaun halo hela manutensaun ba basement no edifísiu ministériu tomak”, salienta.
Totál orsamentu ba manutensaun tomak ba edifísiu ministériu nian inklui planfón ne’ebé aat ne’e hamutuk millaun $2.988.290.
Empreza ne’ebé sei halo manutensaun ne’e mak Eureka joint venture ho PT. Sement Indonensia Logistik.
Jornalista: Arminda Fonseca
Editora: Maria Auxiliadora
