DILI, 31 Janeiru 2026 (TATOLI) – Reitór Universidade Nasionál Timor Lorosa’e (UNTL), Joviano António da Costa, apoia atu transforma departamentu desportu husi nível diploma III ba lisensiatura, bainhira Ministériu Ensinu Superiór Siénsia no Kultura (MESSK) no Ajénsia Nasionál Avaliasaun Akreditasaun Akadémika (ANAAA) prontu ona atu eleva departamentu ne’e.
Nia dehan, nia parte hatene ezisténsia departamentu desportu, la hatene kona-ba kursu ne’e ho diploma III. Maibe, presiza ajusta bainhira ANAAA ho MESSK prontu ona.
“Los duni ita tenke ajusta buat ne’e tuir nesesidade. Ezemplu nasaun presiza lisensiatura ita tenke kria lisensiatura la’ós kria fali diploma III. Tanba ne’e, bainhira ANAAA ho MESSK prontu ona atu eleva ba nível lisensiatura, ha’u hanesan reitór apoiu 100% atu buat hotu bele la’o,” akadémiku ne’e dehan iha resintu UNTL Hera.
Notísia relevante:Estudante UNTL solisita Reitór Eleitu no MESSK transforma Departamentu Desportu ba lisensiatura
Autoridade másima estabelesimentu ensinu superiór públiku realsa, hanesan reitór sempre apoia estudante nia di’ak. Bainhira departamentu ne’e rasik iha profesór atu hanorin no mós ekipamentu sira.
“Ha’u apoiu ba dezenvolvimentu hotu-hotu. Ha’u la apoiu ba problema. Enkuantu ba estudante nia di’ak ha’u sempre apoiu,” Reitór Joviano subliña.
Reitór Joviano akresenta nia parte rona ona ideia husi Ministériu Edukasaun, kona-ba kestaun diploma III labele hanorin sekundáriu.
“Ha’u rona husi ministériu edukasaun katak, diploma III labele hanorin ensinu sekundáriu. Tanba sa mak ita kria diploma III, Nusa ita la kria lisensiatura atubele hanorin ba iha sekundáriu?” nia dehan.
Notísia relevante:UNTL mak bele deside Departamentu Desportu transforma ba lisensiatura
Jornalista: Osória Marques
Editór: Rafael Ximenes de A. Belo
