DILI, 03 Fevereiru 2026 (TATOLI)—Ministra Edukasaun (ME), Dulce de Jesus Soares, hateten ME planeia ona atu koloka profesór bolsa kandidatu ensinu báziku primeiru no segundu siklu iha Fevereiru tinan ne’e, hodi substitui ba profesór reformadu sira.
“Tanba agora diresaun rekursu umanu Ministériu Edukasaun nian halo xamada profesór bolsa kandidatu ensinu báziku mai Ministériu Edukasaun, nune’e kuandu konkorda ho fatin ne’ebé mak hakarak bá, mak sira sei asina termu aseitasaun. Ida-ne’e hotu mak foin tama pose no faze kolokasaun ikus. Ne’ebé, ita iha profesór bolsa kandidatu 1.000-resin ne’ebé ita planu koloka iha Fevereiru ne’e,” Ministra Dulce informa ba jornalista sira iha MSSI, Kaikoli, Tersa ne’e.
Nia hatutan Ministériu Edukasaun kontinua halo formasaun induzaun ba profesór referidu liuhusi formasaun online antes halo kolokasaun.
Notísia relevante: ME hahú xamada submisaun dokumentu ba bolsa kandidatu
Ministra esplika iha pontu importante neen (6) hanesan, ida, iha lista xamada ne’e inklui mós kandidatu sira hosi lista espera Bolsa Kandidatu Ensinu Sekundáriu ne’ebé bolu hodi prenxe kuadru pesoál iha eskola Ensinu Báziku Públiku. Rua, kandidatu sira bele bá uluk survey fatin kolokasaun bazeia ba aneksu kolokasaun iha lista. Nune’e, fó informasaun klara ba kandidatu idaidak molok foti desizaun atu aseita ka rejeita xamada kolokasaun. Tolu, mak iha posibilidade ba kandidatu sira-ne’ebé hakarak troka malu fatin kolokasaun, tenke identifika rasik ema ka kandidatu seluk ne’ebé ho intensaun hanesan ho konsiderasaun ba área disiplina no tenke prenxe formatu troka malu fatin kolokasaun.
Haat, mak kandidatu sira-neʼebé la aseita/rejeita ho xamada kolokasaun hosi grupu rekrutamentu 12 ensinu aekundáriu, sei la implika iha númeru seriasaun kandidatu refere. Lima, mak kandidatu sira-neʼebé la marka prezensa iha data ne’ebé determina ona hodi hatán ba xamada kolokasaun, sei labele partisipa iha serimónia pose no konsidera deziste. Ikus, kandidatu sira-neʼebé la aseita/rejeita ho xamada kolokasaun, automatikamente númeru seriasaun kandidatu refere sei bá liu lista ikus.
Governante ne’e subliña xamada ba profesór bolsa kandidatu ne’e hahú ona iha 22 Janeiru no sei ramata iha 06 Fevereiru 2026.
Ba kandidatu sira-ne’ebé konkorda ho kolokasaun refere atu mai asina termu aseitasaun xamada molok integra ba karreira dosente no submete dokumentu komprovativu sira hanesan sertidaun RDTL, Billete Identidade (BI), Kartaun Eleitorál, rejistu kriminál ne’ebé válidu, atestadu médiku husi HNGV, diploma ne’ebé legalizadu hosi Ministériu Ensinu Superiór, Siénsia no Kultura no konta bankária ho númeru IBAN, maibé submisaun dokumentu tenke ho versaun fízika (hard copy) no koloridu.
Jornalista: Osória Marques
Editór: Xisto Freitas da Piedade
