OEKUSI, 20 Fevereiru 2026 (TATOLI) – Konsellu Kombatente Libertasaun Nasionál (CCLN, sigla portugés), hala’o enkontru kortezia ho Prezidente Autoridade Rejiaun Administrativa Espesiál Oekusi Ambeno (RAEOA), hodi koordena ba futuru atu investe iha setór saúde no seguransa iha Oekusi.
“Ohin ami koordena atividade balun. Ami mós iha membru 24 atu halo investimentu ruma iha Oekusi. Ami sei aprova tanba desizaun hotu iha CCLN desizaun koletivu, kuandu hot-hotu hatan, bele halo mós investimentu iha Oekusi liu-liu saúde no seguransa, tanba veteranu iha mós fundu sufisiente atu halo ida-ne’e. Ne’ebé, ohin ami ko’alia atu harii ospitál ida iha Oekusi. Ami mai koordena ita sei estuda no sei haree, tanba veteranu nia hakarak, kuandu halo buat ida tenke halo,” Prezidente CCLN, Vidál de Jesus “Riak Leman” informa ba jornalista sira hafoin ramata enkontru ho Prezidente Autoridade RAEOA, ohin.
Notísia relevante:Jeferinu Sa’u eleitu nu’udar komisáriu CCLN reprezenta Oekusi ba nasionál
Autoridade másima CCLN ne’e esplika, investimentu fasilidade saúde ne’e la’ós prioridade ba de’it fillu veteranu no kombatente sira maibé ba públiku, tanba verba ne’e mai husi fundu veteranu nian, tanba atu investe tenke hetan retornu, “Ne’e la’o ona ba bisnis (negósiu), ida-ne’e mak ita-nia hakarak, sei investe mak osan mate hela ou lakon tan, ne’e ladi’ak, ita hakarak lori osan atu buka osan,” nia informa.
Investimentu seluk, kona-ba seguransa (security) tanba CCLN mós iha kompañia ida atu responsabiliza ba seguransa, ne’ebé iha Oekusi mós bele. “Ohin ami ko’alia hela ho Prezidente Autoridade ba aban bairua, kona-ba aeroportu, limpeza ho seguransa bele entrega ba kompañia veteranu nian, maibé ema ne’ebé atu tama iha seguransa ho limpeza ne’e, ema veteranu nia oan-sira iha Oekusi, la lori husi fatin seluk, nune’e bele halo estrutura CCLN iha munisipíu mós bele book-aan,” nia hateten.
Notísia relevante:CCLN lansa ofisina CNCV, SA, fundu veteranu
Iha fatin hanesan, Prezidente Autoridade RAEOA, Régio da Cruz Salu, konsidera polítika investimentu ba asuntu ekonomia importante, tanba RAEOA prontu atu koopera.
“Ha’u apresia katak, ita-nia aman veteranu sira, kuandu ko’alia kona-ba preparasaun ba investimentu ekonómiku, institusionalmente, sira tinan-50 avansa liu ona ita, ne’ebé momentu ne’e di’ak atu ita ko’alia, ba futuru atu realiza oinsá, tanba diskusaun dalarua ona; antes ne’e ho Prezidente Autoridade Sesante, agora kontinua diskute tan, ne’ebé ohin foin inisía ba oin ita sei haree tan nia progresu ne’e la’o oinsá,” nia hateten.
Notísia relevante:Governadór BCTL destaka setór privadu sei menus ba investimentu ekonómiku
Jornalista: Abílio Elo Nini
Editór: Rafael Ximenes de A. Belo
