KOVALIMA, 09 Marsu 2026 (TATOLI)-Assosiasaun Ema ho Defisiénsia Timor-Leste (ADTL), segunda ne’e, fasilita formasaun aborda inkluzaun defisiénsia ba funsionáriu iha instituisaun públiku no staff PRADET no FOKUPERS iha munisípiu Kovalima.
“Ita fasilita formasaun ba membru ADTL nian liliu Pradet oinsá atu hakbi’it instituisaun membru sira-nia oinsá fasilita membru sira atu aborda liután inkluzaun defisiénsia iha sira-nia servisu lorloron,” Diretór Ezekutivu , ADTL Cezario da Silva informa ba jornalista sira iha salaun Pradet Kovalima.
Nia konsidera formasaun ne’e importante atu hasa’e abilidade formadór sira-nia nune’e bele fó akompañamentu di’ak ba ema ho defisiénsia no ninia tipu defisiénsia iha baze.
Iha sorin seluk, Konselór Pradet, Cariana Elsa Barreto Amaral reforsa formasaun ida-ne’e importante hodi partilla informasaun kona-bá oinsá aborda inkluzaun defisiénsia ba membru sira nune’e bele fó protesaun di’ak liután ba sidadaun sira ne’ebé moris ho kondisaun defisiénsia fizika.
“Ita hotu hatene katak ema ho defisiénsia iha direitu hanesan ho ema ho kondisaun normal liuhosi formasaun ida-ne’e ajuda ami oinsá atu halo atendementu ba EhD bainhira hasoru violénsia doméstika, seksuál, abuzu seksuál no seluktan.
Tuir dadus NGO Pradet Kovalima nian katak durante ne’e fó ona atendimentu ba kazu hamutuk 5 hanesan kazu violasaun seksuál, abuju seksuál no seluk tan, hasoru ema defisiénsia sira, maibé hosi kazu ne’e ida konsege halo julgamentu iha tribunal to’o tama prijaun.
Jornalista:Celestina Teles
Editór: Florencio Miranda Ximenes
