BAUKAU, 12 Marsu 2026 (TATOLI)—Autoridade lokál husi Baguia preokupa ho kondisaun ponte Gomilafa ne’ebé liga Suku Atelari, Postu Administrativu Laga ho Suku Lavateri, Postu Administrativu Baguia, ne’ebé ameasadu kotu.
Xefe Suku Alawa Kraik, Postu administrativu Baguia, João Baptista Antônio Alves, hateten preokupasaun ne’e hato’o ona ba kompañia responsavel ne’ebé halo reabilitasaun ba estrada diresaun Laga bá Baguia maibé ponte referidu laiha Bill of Quantity (BoQ).
“Ami rekomenda ba Governu liuhusi Ministériu Obra Públika atu tau-atensaun tanba fó impkatu ba movimentu transporte,” João Alves hateten iha Vila Nova, Baukau, Kinta ne’e.
Nia haktuir ponte Gomilafa kategoria grave tanba kauza husi movimentu transporte liuliu mobiliza materiál reabilitasaun estrada, nune’e rezulta ponte ne’e hetan estragu husi parte sorin karuk.
Nia subliña ponte Gomilafa úniku instrumentu ne’ebé fasilita movimentasaun transporte husi munisípiu ba Postu Baguia no sai dalan aternativu ba Postu Uatukarbau, Munisípiu Vikeke.
“Ami koordena ona ho kompañia atu apoia rezolve kondisaun ponte ne’e,” João Alves akresenta.
Entretantu, ponte Gomilafa konstrui iha tempu okupasaun Indonézia, lokalizadu iha área baliza entre Postu Laga no Baguia, iha-ne’ebé fasilita movimentu transporte liuliu komunidade hamutuk 11.725 kompostu husi mane 5.887 no feto 5.838 iha Baguia.
Jornalista: Natalino Belo
Editór: Xisto Freitas da Piedade
