VIKEKE, 13 Marsu 2026 (TATOLI)—Diretór Servisu Munisipál Apoiu Organizasuan Naun Govermentál Komunitáriu, Cosme Sarmento, informa Xefe Suku Vessoru, Postu Administrativu Uatulari, Paulo Fernandes, lakon vida.
“Matebian semana ne’e hala’o hela enkontru ba Programa Nasionál Dezenvolvimentu Suku (PNDS) iha sede Suku Vessoru, mak moras atake ne’ebé ita-nia pesoál saúde sira evakua bá sentru saúde Uatulari, hafoin ne’e transfere bá Hospital Nacional Guido Valadares (HNGV) Dili maibé lakonse salva vida. Matebian hakotu-iis iha Kuarta (11/03) maizumenus tuku 12:00 Otl,” Cosme Sarmento ba TATOLI iha Postu Vikeke Vila, Sesta ne’e.
Cosme haktuir matebian nia isin-mate transporta ona bá nia rezidénsia iha Suku Vessoru, ohin, hodi kontinua ba prosesu fúnebre.
Nia dehan, kona-ba xefe suku nia fatin daudaun ne’e sekretáriu suku mak substitui hodi halo atendimentu suku ba komunidade, no atu hili fali xefe suku foun sei liuhusi enkontru hodi prosede ba eleisaun.
“Ita-nia xefe suku ne’e asumi kna’ar xefe suku foin tinan rua,” nia haktuir.
Iha fatin ketak, enfermeiru Postu Saúde Vessoru, Rosito Guterres da Silva, relata xefe suku Vessoru Paulo Fernandes iha loron Tersa (10/03) hala’o hela enkontru iha sede Suku Vessoru. Iha enkontru ne’e, líder suku ne’e hamriik iha oin ko’alia hela, derepente moras tensaun atake nian oin halai, atu monu mak nia maluk sira ba kaer tiha hodi lori xefe suku bá nia rezidénsia ne’ebé besik iha sede suku.
“Hafoin membru konsellu sira bá bolu ami hodi bá halo atendimentu ba xefe suku nia kondisaun moras, nune’e ha’u rasik mak ba konsulta xefe suku ne’ebé ha’u koko xefe suku nia tensaun sa’e to’o 224/150. Ha’u bolu kedas ambulánsia husi sentru saúde Uatulari bá tula xefe bá sentru saúde hodi kontinua halo tratamentu. Xefe suku ne’e, ninia moras uluk kedas hanesan ne’e. Baibain moras ne’e nia bá check-up iha HNGV. Maibé, iha loron ida nia atu bá check-up ne’e hala’o fali enkontru iha sede suku, entaun nia la bá halo check-up. Iha momentu ne’e kedas moras atake nia,” nia esplika.
Jornalista: Vitorino Lopes da Costa
Editór: Xisto Freitas da Piedade
